Manjusha Nagpure – पुणे शहराच्या ५८ व्या आणि दहाव्या महिला महापौर म्हणून निवड झालेल्या मंजूषा दीपक नागपुरे या उच्चशिक्षित, अनुभवी आणि संघटनात्मक पार्श्वभूमी असलेल्या नेत्या आहेत. वयाच्या ४६ व्या वर्षी त्यांनी महापालिकेच्या सर्वोच्च पदाची जबाबदारी स्वीकारली आहे.नागपुरे यांनी एम. कॉम. पदवी पूर्ण केल्यानंतर मनुष्यबळ व्यवस्थापन विषयात एमबीएची पदव्युत्तर पदवी घेतली. काही काळ त्यांनी माहिती तंत्रज्ञान क्षेत्रातील कॉर्पोरेट कंपनीत नोकरी केली. त्यानंतर त्यांनी पूर्ण वेळ राजकीय आणि सामाजिक कार्यात स्वतःला झोकून दिले.राष्ट्रसेविका समितीच्या स्वयंसेविका असलेल्या नागपुरे १९९६ पासून अखिल भारतीय विद्यार्थी परिषदेत सक्रिय होत्या. संघटनात्मक कामातील योगदानाबद्दल त्यांना ‘गुगल अर्थ’ पुरस्काराने सन्मानित करण्यात आले आहे. सिंहगड रस्त्यावरील माणिकबाग सनसिटी प्रभाग क्रमांक ३५ मधून त्या तिसऱ्यांदा महापालिकेवर निवडून आल्या आहेत. यंदाच्या निवडणुकीत त्या पुणे महापालिकेत बिनविरोध निवडून येणाऱ्या पहिल्या महिला लोकप्रतिनिधी ठरल्या.त्यांचे पती दीपक नागपुरे हे व्यावसायिक असून, राष्ट्रीय स्वयंसेवक संघाचे स्वयंसेवक आहेत. ते भाजपचे शहर सरचिटणीस आहेत. नागपुरे दाम्पत्याला दोन मुले आहेत.महापालिकेत त्यांनी जिल्हा नियोजन समिती सदस्य, स्थायी समिती सदस्य, विधी समिती, लेखापरीक्षण समिती, शहर सुधारणा समिती, तसेच बालकल्याण समिती सदस्य म्हणून काम केले आहे. सिंहगड रस्ता परिसराच्या विकासासाठी त्यांनी सातत्याने पाठपुरावा केला आहे. सिंहगड रस्ता उड्डाण पूल, सनसिटी ते कर्वेनगर उड्डाण पूल, महिलांसाठी व्यावसायिक प्रशिक्षण केंद्र, महिलांसह ज्येष्ठ नागरिकांच्या आरोग्यासाठी वर्षभर विविध उपक्रम राबविणे, वाहतूक कोंडी फोडण्यासाठी पर्यायी रस्त्यांचे विकासकाम, सार्वजनिक आरोग्य व्यवस्था सक्षम करणे, तसेच एकतानगरीतील पूरस्थितीत नागरिकांना मदत करणे, अशा विविध कामांमुळे त्यांची स्वतंत्र ओळख निर्माण झाली आहे. २०१२ पासून त्या नगरसेविका असून, नुकत्याच झालेल्या महापालिका निवडणुकीत त्या बिनविरोध निवडून आल्या. आता त्या महापौरही बिनविरोध झाल्या आहेत.
