नीरा नदीच्या अनेक बंधाऱ्यांतील लाभ क्षेत्रात अन्य जातींचे मासे दुर्मिळ
निमसाखर : निमसाखरजवळील व पळस मंडळनजीकच्या कोल्हापुरी पद्धतीच्या बंधाऱ्यांमध्ये साठवण क्षेत्रात अनेक तरुण मासेमारी करून आपली उपजीविका करत असतात; मात्र हे तरुण गेले काही दिवसांपासून नीरा नदीत मांगूर आणि चिलापी जातीचे मासे मोठ्या प्रमाणात तर मरळ, रहू, वामसह अन्य मासे कमी प्रमाणात मिळत आहे. याचे कारण म्हणजे मांगूर जातीचा मासा हा इतर माशांसाठी कर्दनकाळ ठरत आहे.

निमसाखर गावापासून सुमारे दोन किलोमीटरवर अंतरावर पळसमंडळ (माळशिरस) जवळ कोल्हापूर पद्धतीचा बंधारा आहे. या बंधाऱ्यामुळे या भागातील नदीकाठची शेती उपसा सिंचन योजना राबवल्यामुळे ओलिताखाली आली. या मोठा फायदा होत आहे. शेतीसाठी सध्या निमसाखर येथील बंधाऱ्यांमध्ये 40 ते 50 टक्के पाणीसाठा शिल्लक आहे. झपाट्याने ही नीरा नदीच्या बंधारा लाभक्षेत्रातील पाणी कमी होत आहे.

यापूर्वी या भागातील तरुण मासेमारी करीत असताना रहु जातीचा मासा नऊ किलोपर्यंत नीरा नदीमध्ये सापडले आहेत. नदीत यापूर्वी रहू, चिलापी, खेकडा, वाम, मरळ, कटारणा, मळया, निलगेर, पानगुट, भोडगी यांसह अन्य प्रकारचे मासे सापडत असल्याचे या भागातील तरुणांनी सांगितले; मात्र सगळ्यात जास्त बंदी असलेला मांगूर जातीचा मासा सापडत आहे. हा मासा आरोग्यासाठी त्रासदायक, घातक असल्यामुळे नागरिक हा मासा विकत घेत नाहीत. याच बरोबर हा मासा इतर माशांना गिळंकृत करत असल्यामुळे इतर जातीचे मासे मिळणे दुरापास्त झाले आहे.

धरणानंतर नदीतही दर्शन
ज्याप्रमाणे बंदी असलेल्या मांगूर जातीचा मासा उजनी धरणात अथवा भिगवण भागातील तळ्यांमध्ये सापडतो. या प्रमाणे हा मासा नीरा नदीतही सापडत असल्यामुळे या माशाची दहशत आत्ता नीरा नदीतही जाणवू लागली आहे. यामुळे ग्रामीण भागातील मत्स्य व्यवसाय करणारे तरुणांना मांगूर व चिलापी जातीचा मासा मोठ्या प्रमाणावर सापडत तरी अन्य दुर्मिळ मासे अल्प प्रमाणात मासे मिळत असल्याने हवालदिल झाले आहेत. यामुळे बेरोजगारीची कुऱ्हाड जणू काही या तरुणांवर पडली तर आहेच; शिवाय या भागातील खवय्ये सुद्धा धास्तावले आहेत.