नाशिक : उद्धवसेनेला नाशिकमध्ये पुन्हा एकदा धक्का बसला आहे. सुधाकर बडगुजर, विलास शिंदे यांच्यानंतर आणखी एका बड्या नेत्याने शिवबंधन सोडले आहे. विशेष म्हणजे चारच दिवसांपूर्वी उद्धव ठाकरेंनी ज्यांच्यावर महानगर प्रमुख पदाची जबाबदारी सोपवली, त्या मामा राजवाडे यांनीच उद्धवसेनेला जय महाराष्ट्र केला आहे. मामा राजवाडे भाजपचा झेंडा खांद्यावर घेणार आहेत. शिवसेना ठाकरे गटाचे उपनेते सुनील बागुल आणि महानगरप्रमुख मामा राजवाडे यांच्यासह पाच माजी नगरसेवक आगामी काळात भाजपमध्ये प्रवेश करणार आहेत. स्थायी समितीचे माजी सभापती गणेश गीते यांच्यासह कमलेश बोडके, प्रशांत दिवे, सचिन मराठे, सीमा ताजने यांचा आज भाजपात प्रवेश होणार आहे. याआधी, तत्कालीन महानगरप्रमुख विलास शिंदे यांच्या शिवसेना प्रवेशाची कुणकुण लागताच गेल्या आठवड्यात शुक्रवारीच मामा राजवाडे यांची त्याजागी नियुक्ती करण्यात आली होती. त्यानंतर केवळ चारच दिवसांच्या अंतराने मामा राजवाडे यांनी उद्धवसेनेची साथ सोडली आहे. दरम्यान, सध्या चार नगरसेवक आमच्यासोबत आहेत, असा दावा उद्धवसेनेचे नाशिक जिल्हाप्रमुख डी जी सुर्यवंशी यांनी केला आहे. नाशिकमध्ये धनशक्ती विरुद्ध जनशक्ती असा लढा सुरु आहे. मामा राजवाडे यांच्यावर दबाव टाकून भाजप प्रवेश करायला लावला आहे. भाजप दबावाचे राजकारण करुन फोडाफोडी करत असल्याचा आरोपही सुर्यवंशींनी पत्रकार परिषद घेत केला. अपूर्व हिरे भाजपमध्ये… शिंदेसेनेच्या वाटेवर असलेल्या माजी आमदार अपूर्व हिरे यांनी नूतन प्रदेशाध्यक्ष रवींद्र चव्हाण यांच्या उपस्थितीत मुंबईत पक्षप्रवेश केला. विशेष म्हणजे, सुधाकर बडगुजर यांच्या प्रवेश सोहळ्याकडे पाठ फिरवणाऱ्या आमदार सीमा हिरे यांनी अपूर्व हिरे यांच्या प्रवेश सोहळयाला हजेरी लावली. त्यामुळे नाशिक पश्चिममध्ये भाजपला आणखी बळ मिळणार आहे. दरम्यान, नाशिक पूर्व मतदारसंघातील राशपचे उमेदवार गणेश गितेंसह चार माजी नगरसेवक भाजपमध्ये दाखल होण्याची शक्यता आहे. नाशिकच्या राजकारणात हायव्होल्टेज ड्रामा नाशिकच्या राजकारणात सध्या वेगवान घडामोडी घडत आहेत. मामा राजवाडे आणि सुनील बागुल यांच्या पक्षप्रवेशाला काही काळ ब्रेक लागला होता, पण आता त्यांचा भाजपात प्रवेश निश्चित झाला आहे. याशिवाय, नाशिक पूर्व मतदारसंघातील राष्ट्रीय समाज पक्षाचे उमेदवार गणेश गीते आणि चार माजी नगरसेवकही भाजपात दाखल होण्याच्या तयारीत आहेत. ठाकरे गटाची कमजोर होत चाललेली पकड सुधाकर बडगुजर, विलास शिंदे आणि आता मामा राजवाडे यांच्या पक्षांतराने उद्धव ठाकरे यांच्या शिवसेनेला नाशिकमध्ये सातत्याने धक्के बसत आहेत. नाशिक पश्चिम आणि पूर्व मतदारसंघात भाजप आणि शिंदे गटाची ताकद वाढत असताना ठाकरे गटाची पकड ढासळत चालली आहे. स्थानिक पातळीवरील ही फाटाफूट ठाकरे गटासाठी आगामी निवडणुकांमध्ये मोठे आव्हान ठरू शकते.
