कडूस : चुकीच्या आणि खोट्या आरोपांमुळे तब्बल साडेसतरा वर्षे कारागृहात राहण्याची वेळ आलेल्या रानमळा येथील सतीश शिंदे यांनी प्रतिकूल परिस्थितीसमोर न झुकता शिक्षणाच्या बळावर नवा इतिहास घडविला आहे. कारागृहातील कठीण जीवन जगत असतानाच त्यांनी विविध शैक्षणिक अभ्यासक्रम पूर्ण करून ‘मानद विद्यावाचस्पती’ ही प्रतिष्ठेची पदवी प्राप्त केली आहे. त्यांच्या या यशामुळे परिसरातून कौतुकाचा वर्षाव होत असून, संकटांवर मात करून स्वतःचे आयुष्य घडविण्याचा प्रेरणादायी संदेश त्यांनी समाजाला दिला आहे.

या उल्लेखनीय कामगिरीबद्दल सतीश शिंदे यांच्या सन्मानार्थ रानमळा येथे नुकताच कृतज्ञता सोहळा आयोजित करण्यात आला. कार्यक्रमाच्या प्रास्ताविकात राष्ट्रपती पुरस्कार विजेते जिजाराम शिंदे यांनी सतीश शिंदे यांच्या संघर्षमय प्रवासाचा आढावा घेतला. त्यांनी सांगितले की, कारागृहात शिक्षा भोगत असतानाही सतीश शिंदे यांनी हार न मानता चार पदव्या, आठ पदविका आणि दोन प्रमाणपत्र अभ्यासक्रम यशस्वीरित्या पूर्ण केले.त्यांच्या शिक्षणाप्रती असलेल्या निष्ठेची आणि सामाजिक बांधिलकीची दखल घेत दीनदयाळ उपाध्याय राष्ट्रीय विद्यापीठाने त्यांना ‘विद्यावाचस्पती’ हा सर्वोच्च मानद सन्मान प्रदान केला असल्याची माहितीही यावेळी देण्यात आली.

या प्रसंगी खेड पंचायत समितीचे माजी सदस्य व उद्योजक शंकर कावडे, कडूसच्या सरपंच हेमलता खळदकर, कैलास मुसळे, चैतन्य संस्थेच्या सुधाताई कोठारी, माजी उपसभापती माणिक कदम, सरपंच प्रमोद शिंदे, यादव शिंदे, माजी उपशिक्षणाधिकारी अशोक कडलक, अरविंद दौंडकर, उषा भुजबळ, पर्यावरण संस्थेचे मिलिंद शिंदे, शंकर शिंदे, दशरथ भुजबळ, ज्योती घोडेकर यांच्यासह अनेक मान्यवर उपस्थित होते.