Mahatma gandhi statue : ऑस्ट्रेलियातील मेलबर्न शहरात असलेल्या ऑस्ट्रेलियन इंडियन कम्युनिटी सेंटरमधून ‘महात्मा गांधी‘ यांचा ब्राँझचा पुतळा चोरीला गेल्याची धक्कादायक घटना उघडकीस आली आहे. चोरट्यांनी अँगल ग्राइंडरचा वापर करून पुतळा कापून चोरून नेल्याने ऑस्ट्रेलियातील भारतीय समुदायात तीव्र संताप आणि अस्वस्थतेचे वातावरण निर्माण झाले आहे. Mahatma gandhi statue Mahatma Gandhi व्हिक्टोरिया पोलिसांच्या माहितीनुसार, १२ जानेवारी २०२६ रोजी रात्री १२.५० वाजण्याच्या सुमारास रोविल येथील किंग्जले क्लोज परिसरात ही घटना घडली. तीन अज्ञात आरोपींनी या चॅरिटी संस्थेच्या आवारात प्रवेश करत पुतळा कापून घटनास्थळावरून नेला. प्रकरणाचा तपास नॉक्स क्राईम इन्व्हेस्टिगेशन युनिट करत आहे. पुतळ्याचे ऐतिहासिक व सांस्कृतिक महत्त्व काय? हा पुतळा भारत सरकारच्या ‘इंडियन कौन्सिल फॉर कल्चरल रिलेशन्स’ (ICCR) कडून भेट स्वरूपात देण्यात आला होता. १२ नोव्हेंबर २०२१ रोजी ऑस्ट्रेलियाचे माजी पंतप्रधान स्कॉट मॉरिसन यांच्या हस्ते या पुतळ्याचे अनावरण करण्यात आले होते. हा पुतळा अहिंसा, शांतता आणि सांस्कृतिक एकतेचे प्रतीक मानला जातो. भंगार विक्रेत्यांना पोलिसांचा सतर्कतेचा इशारा : पुतळा ब्राँझचा असल्यामुळे चोरटे तो धातू म्हणून विकण्याचा प्रयत्न करू शकतात, अशी शक्यता पोलिसांनी व्यक्त केली आहे. त्यामुळे परिसरातील सर्व भंगार विक्रेत्यांना सतर्क राहण्याचे आवाहन करण्यात आले आहे. कोणी संशयास्पदरीत्या पुतळा किंवा त्याचे तुकडे विक्रीस आणल्यास त्वरित पोलिसांना कळवण्याच्या सूचना देण्यात आल्या आहेत. यापूर्वीही झाला होता विटंबनेचा प्रयत्न : उल्लेखनीय बाब म्हणजे, २०२१ मध्ये उद्घाटनानंतर अवघ्या २४ तासांत या पुतळ्याची अज्ञात व्यक्तींनी विटंबना केली होती. त्या घटनेचे तीव्र पडसाद भारत आणि ऑस्ट्रेलिया दोन्ही देशांत उमटले होते. याआधीही काही देशांमध्ये खलिस्तानी समर्थकांकडून गांधीजींच्या पुतळ्यांना लक्ष्य केल्याच्या घटना समोर आल्या आहेत. त्यामुळे या चोरीमागे कोणत्यातरी विशिष्ट विचारसरणीचा हात आहे का, याचाही तपास पोलिसांकडून केला जात आहे. हे देखील वाचा…. Mamata Banerjee : “पिडितांना बाजू मांडण्याची संधीच नाही…”; एसआयआर प्रक्रियेवरून ममता बॅनर्जी आक्रमक
