Pune Timber Market Fire : ४५ दुकाने, ६ घरे आगीच्या भक्ष्यस्थानी; टिंबर मार्केटच्या आगीचं गूढ कायम, पोलिसांकडून अग्निशमन विभागाला पत्रव्यवहार
पुण्यातील भवानी पेठेतील टिंबर मार्केट परिसरात लागलेल्या भीषण आगीने व्यापाऱ्यांचे संसार उद्ध्वस्त केले, तर अनेक कुटुंबांवर आर्थिक संकट ओढावले आहे

Pune Timber Market Fire – पुण्यातील भवानी पेठेतील टिंबर मार्केट परिसरात लागलेल्या भीषण आगीने व्यापाऱ्यांचे संसार उद्ध्वस्त केले, तर अनेक कुटुंबांवर आर्थिक संकट ओढावले आहे. मध्यरात्रीच्या सुमारास भडकलेल्या या आगीने काही तासांतच रौद्र रूप धारण करत प्लायवूडच्या दुकानांसह तब्बल ४५ दुकाने आणि सहा घरांना आपल्या कवेत घेतले.
सुदैवाने या दुर्घटनेत कोणतीही जीवितहानी झाली नाही; मात्र आगीमागचे नेमके कारण अद्याप समोर आलेले नाही. शॉर्टसर्किट, अपघात की जाणीवपूर्वक लावलेली आग? अशा विविध शक्यतांच्या पार्श्वभूमीवर आता पोलिसांनी तपासाची चक्रे वेगाने फिरवली आहेत. अग्निशमन विभागाच्या तांत्रिक अहवालानंतरच या आगीच्या कारणावर प्रकाश पडण्याची शक्यता आहे.
आगीचे कारण अद्याप गुलदस्त्यात :
या आगीने काही वेळातच परिसरातील दुकानांना आणि घरांना वेढा घातला. या घटनेप्रकरणी खडक पोलीस ठाण्यात आग आणि जाळपोळीची नोंद करण्यात आली आहे. मात्र, आग नेमकी कशामुळे लागली, याचा उलगडा अद्याप झालेला नाही.
आगीचे मूळ कारण शोधण्यासाठी पोलिसांनी अग्निशमन विभागाशी पत्रव्यवहार केला आहे. घटनास्थळाची पाहणी, उपलब्ध माहिती आणि तांत्रिक बाबींचा अभ्यास करून अग्निशमन विभाग आपला अहवाल सादर करणार आहे.
हा अहवाल तपासाच्या दृष्टीने महत्त्वाचा ठरणार आहे. आग अपघाताने लागली की त्यामागे घातपात किंवा जाणीवपूर्वक जाळपोळीचा प्रकार आहे, यासह सर्व शक्यतांची पोलिसांकडून पडताळणी केली जात आहे.
४५ दुकानदारांचे मोठे नुकसान; विम्यासाठी अद्याप संपर्क नाही
या आगीत ४५ दुकाने आणि सहा घरांचे मोठ्या प्रमाणावर नुकसान झाले आहे. दुकानांमधील प्लायवूड आणि इतर साहित्य जळून खाक झाल्याने व्यापाऱ्यांचे आर्थिक नुकसान झाले आहे. घरांमधील संसारोपयोगी वस्तूही आगीच्या भक्ष्यस्थानी पडल्याने बाधित कुटुंबांसमोर मोठे संकट उभे राहिले आहे.
पोलिसांनी दिलेल्या माहितीनुसार, आगीत नुकसान झालेल्या ४५ दुकानांपैकी अद्याप एकाही दुकानदाराने विम्याच्या नुकसानभरपाईसाठी संपर्क साधलेला नाही.
नुकसानग्रस्त दुकाने आणि घरांचा पोलिसांकडून पंचनामा करण्यात आला असून, नुकसानीची नोंद घेण्यात आली आहे. तपासासाठी आवश्यक माहितीही संकलित केली जात आहे.






