CNG&PNG Price Hike : पुणेकरांचा प्रवास आणि स्वयंपाक आता आणखी महागणार आहे. एमएनजीएलने सीएनजी दरात प्रतिकिलो सव्वा रुपयांची, तर घरगुती पीएनजी दरात दीड रुपयांची वाढ केली आहे. आज मध्यरात्रीपासून हे नवे दर लागू होत असून, सीएनजी आता थेट ९९ रुपये किलोवर पोहोचला आहे. त्यामुळे वर्षभरात पाचव्यांदा गॅस दरवाढीचा चटका बसलेल्या सर्वसामान्यांचे बजेट पुन्हा कोलमडणार आहे.

एमएनजीएल इंडिया लिमिटेडने पुन्हा एकदा इंधन दरवाढ जाहीर केली असून, या निर्णयामुळे पुणे, पिंपरी-चिंचवड, चाकण, तळेगाव आणि हिंजवडीमध्ये सीएनजीचा नवा दर ९९.०० रुपये प्रतिकिलो इतका झाला आहे. तर, पुणे आणि पिंपरी-चिंचवड महापालिका क्षेत्रातील घरगुती पीएनजी (पाईप गॅस) आता ५३.०० रुपये प्रति एससीएम या दराने मिळणार आहे.

गेल्या वर्षभरात पुण्यात सीएनजी दरात पाच वेळा, तर घरगुती पीएनजीमध्ये दोन वेळा दरवाढ झाली आहे. ऑक्टोबर २०२५ मध्ये ९०.७५ रुपये प्रतिकिलो असलेला सीएनजी मे २०२६ पासून टप्प्याटप्प्याने वाढत आता ९९ रुपयांवर पोहोचला आहे. लवकरच सीएनजी शंभरी पार करणार असे दिसते. वर्षभरात सीएनजीमध्ये एकूण ८.२५ रुपये, तर पीएनजीमध्ये २.३५ रुपयांची वाढ झाली आहे. एकूण गॅस पुरवठ्यात आयात नैसर्गिक वायूचे (RLNG) प्रमाण वाढल्याने गॅस खरेदी आणि आयात खर्चात वाढ झाली आहे. त्यामुळे ही दरवाढ करावी लागल्याचे कंपनीने सांगितले.