Maharashtra Tourists in Nepal – नेपाळमध्ये पूर आणि भूस्खलनामुळे निर्माण झालेल्या आपत्कालीन परिस्थितीत महाराष्ट्रातील सात पर्यटक अडकले असून, त्यापैकी मुंबई व पुण्यातील प्रत्येकी दोन पर्यटकांशी संपर्क साधण्यात राज्य सरकारला यश आले आहे. हे चौघेही सुरक्षीत असल्याचे स्पष्ट झाले असून, उर्वरित तीन पर्यटकांशी संपर्क प्रस्थापित करण्यासाठी शासनाकडून युद्धपातळीवर प्रयत्न सुरू आहेत.

पर्यटन मंत्री शंभूराज देसाई यांनी नेपाळमधील परिस्थितीचा आढावा घेत संबंधित यंत्रणांना महाराष्ट्रातील पर्यटकांच्या सुरक्षिततेला सर्वोच्च प्राधान्य देण्याच्या सूचना दिल्या आहेत. पूर आणि भूस्खलनामुळे नेपाळमधील अनेक मार्ग, पूल आणि दळणवळण व्यवस्था विस्कळीत झाल्याने संपर्क साधण्यात अडथळे येत आहेत. महाराष्ट्र शासनाने नेपाळमध्ये अडकलेल्या नागरिकांसाठी 1070 हा टोल-फ्री हेल्पलाइन क्रमांक तसेच 022-69107600 हा राज्य नियंत्रण कक्षाचा क्रमांक उपलब्ध करून दिला आहे.

नियंत्रण कक्ष चोवीस तास कार्यरत असून, पर्यटकांच्या कुटुंबीयांकडून मिळणार्‍या माहितीनुसार संबंधित यंत्रणांशी तातडीने संपर्क साधला जात आहे. राज्य आपत्ती व्यवस्थापन विभाग, पर्यटन विभाग, जिल्हा प्रशासन तसेच केंद्र सरकार आणि भारतीय दूतावास यांच्यात समन्वय ठेवण्यात आला आहे. नेपाळमधील परिस्थितीवर सातत्याने लक्ष ठेवून अडकलेल्या पर्यटकांची नेमकी माहिती मिळविण्याचे काम सुरू आहे.

दरम्यान, नागरिकांनी घाबरून जाऊ नये आणि सोशल मीडियावरील अपुर्‍या किंवा अफवांवर आधारित माहितीकडे दुर्लक्ष करावे, असे आवाहन शासनाने केले आहे. उर्वरित तीन पर्यटकांशी संपर्क साधून त्यांच्या सुरक्षिततेची खात्री करण्यासाठी सर्व उपलब्ध माध्यमांचा वापर केला जात असल्याचे मंत्री देसाई यांनी सांगितले.