Newasa News : संत ज्ञानेश्वर महाराज मंदिराकडे जाणाऱ्या रस्त्यावरील अतिक्रमणाविरोधात आवाज उठवणे एका हिंदुत्ववादी नेत्याला चांगलेच महागात पडल्याची धक्कादायक घटना नेवासे शहरात (Newasa News) घडली आहे. प्रखर हिंदुत्ववादी नेते ऋषिकेश शेटे यांच्या वाहनावर भरदिवसा एका जमावाने अचानक तुफान दगडफेक केली. या भीषण हल्ल्यात शेटे यांच्या वाहनाचे प्रचंड नुकसान झाले असून, स्वतः ऋषिकेश शेटे किरकोळ जखमी झाले आहेत.

गुरुवारी दुपारी एक वाजेच्या सुमारास ऋषिकेश शेटे यांनी संत ज्ञानेश्वर मंदिराकडे जाणारा रस्ता भाविकांसाठी (Newasa News) खुला करावा, या मागणीचे निवेदन नेवासे नगरपंचायतीला दिले होते. नगरपंचायत प्रशासनाने तातडीने दखल घेत सार्वजनिक बांधकाम विभाग व पोलिसांच्या मदतीने खोलेश्वर गणपती मंदिर चौक ते नगरपंचायत परिसरातील रस्त्यावरील फळ विक्रेत्यांना ठरवून दिलेल्या जागेवर स्थलांतरित होण्याची समज देण्यास सुरुवात केली.

प्रशासनाकडून ही कारवाई सुरू असतानाच, दुपारी साडेतीनच्या सुमारास ऋषिकेश शेटे हे आपल्या वाहनातून घरी परतत होते. खोलेश्वर गणपती चौकाजवळ त्यांची गाडी येताच, संतप्त फळ विक्रेते आणि जमावाने शेटे यांच्या गाडीवर तुफान दगडफेक सुरू केली. या हल्ल्यामुळे परिसरात एकाएकी प्रचंड गोंधळ आणि भीतीचे वातावरण निर्माण झाले.

घटनेचे गांभीर्य ओळखून नेवासा पोलीस ठाण्याचे पोलीस निरीक्षक प्रताप दराडे यांनी सहकाऱ्यांसह तत्काळ घटनास्थळी धाव घेतली आणि जमावाला पांगवून शेटे यांच्या वाहनाला सुरक्षित बाहेर काढले. या घटनेची माहिती मिळताच जिल्हा पोलीस अधीक्षक मुम्मका सुदर्शन यांनी तातडीने नेवासे शहरात भेट देऊन घटनास्थळाची पाहणी केली.

शहरात सध्या तणावपूर्ण (Newasa News) शांतता असून पोलीस उपविभागीय अधिकारी निरज राजगुरू, पोलीस निरीक्षक प्रताप दराडे यांच्यासह मोठा पोलीस बंदोबस्त तैनात करण्यात आला आहे. रात्री उशिरापर्यंत या प्रकरणी गुन्हा दाखल करण्याची प्रक्रिया सुरू होती.