Maharashtra Cabinet : मुख्यमंत्री देवेंद्र फडणवीस यांच्या अध्यक्षतेखाली मंगळवारी राज्य सरकारची मंत्रिमंडळ बैठक घेण्यात आली आहे. या बैठकीत काही महत्त्वाचे निर्णय घेण्यात आले. बैठकीत महाराष्ट्र राज्य कॉम्प्रेस्ड बायोगॅस धोरणासंबंधी महत्त्वाचा निर्णय घेण्यात आला आहे. (Maharashtra Cabinet) यासाठी प्रत्येक जिल्ह्यात समन्वय समिती असणार आहे. तर बायोगॅस प्रकल्प पीपीपी, हायब्रीड अन्युईटी तत्वावर राबवण्यात येणार आहे. या वर्षासाठी पाचशे कोटींची तरतूद करण्यात येणार आहे. यामुळे घनकचऱ्याचे पर्यावरणपूरक व्यवस्थापन, हरित गृह वायू उत्सर्जन कमी होणार आहे. तसेच, राज्यातील सात आदर्श महाविद्यालयातील शिक्षकांना विद्यापीठ अनुदान आयोगाच्या निर्देशानुसार मूळ वेतन मिळणार आहे. या पदावरील शिक्षकांना उच्च व तंत्रशिक्षण विभागाच्या पद भरतीमध्ये अतिरिक्त गुण मिळणार आहेत. तसेच सातारा जिल्ह्यातील मौजे नागेवाडी येथे आय. टी. पार्कला जमीन देण्याचा निर्णय घेण्यात आला आहे. महाराष्ट्र औद्योगिक विकास महामंडळास ४२. ५५ हेक्टर जमीन देण्यात येणार आहे. लवकर राज्य सरकारकडून या निर्णयांबाबतचा तपशील जाहीर केला जाईल. (Maharashtra Cabinet) राज्यातील कमाल जमीन धारणा मर्यादा नियमानुसार भोगवटादार वर्ग-२ मधून भोगवटादार वर्ग-१ मध्ये रुपांतरणाच्या अधिमुल्याची पुनर्रचना होणार आहे. याबाबतची अधिसूचना काढण्यास मान्यता देण्यात आली आहे. मंत्रिमंडळ निर्णय (Maharashtra Cabinet) १) महाराष्ट्र राज्य कॉम्प्रेस्ड बायोगॅस धोरण – 2026 जाहीर २) राज्यातील सात आदर्श महाविद्यालयातील शिक्षकांना विद्यापीठ अनुदान आयोगाच्या निर्देशानुसार मूळ वेतन मिळणार ३) सातारा जिल्ह्यातील मौजे नागेवाडी येथे आय. टी. पार्कला जमीन देण्याचा निर्णय. ४) राज्यातील कमाल जमीन धारणा मर्यादा नियमानुसार भोगवटादार वर्ग-२ मधून वर्ग-१ मध्ये रुपांतरणाच्या अधिमुल्याची पुनर्रचना.
