Lonavala Municipal Council – शहरातील वाढत्या अतिक्रमणाच्या मुद्द्यावरून राजकीय वातावरण तापले आहे. काही दिवसांपूर्वी जिल्हाधिकारी कार्यालयात झालेल्या बैठकीत माजी नगराध्यक्षा सुरेखा जाधव आणि माजी उपनगराध्यक्ष श्रीधर पुजारी यांनी अतिक्रमण वाढीस आमदार सुनील शेळके जबाबदार असल्याचा आरोप केला होता. त्याचे पडसाद गुरूवारी लोणावळा नगरपरिषदेच्या सर्वसाधारण सभेत उमटले.

सभागृह नेते धनंजय काळोखे यांनी सभेत या आरोपांचा तीव्र निषेध केला. आमदार सुनील शेळके यांच्यावर करण्यात आलेले आरोप राजकीय हेतूने प्रेरित असून पूर्णपणे निराधार असल्याचे त्यांनी स्पष्ट केले. यावेळी काळोखे यांनी प्रशासनाकडे महत्त्वाची मागणीही केली. शहरात मोठ्या प्रमाणावर अतिक्रमण झाल्याचा दावा करणाऱ्या माजी नगराध्यक्षा सुरेखा जाधव आणि माजी उपनगराध्यक्ष श्रीधर पुजारी यांना प्रशासनाने कार्यालयात बोलावून घ्यावे, अशी मागणी त्यांनी सर्वसाधारण सभेत केली.

शहरातील नेमकी कोणकोणती अतिक्रमणे आहेत, याची अधिकृत माहिती आणि यादी संबंधितांकडून घ्यावी. त्यानंतर त्यांनी दाखवून दिलेल्या ठिकाणांवर प्रशासनाने तातडीने कारवाई करावी, असे आवाहनही काळोखे यांनी केले. अतिक्रमणाच्या मुद्द्यावरून सभागृहात काही काळ जोरदार चर्चा रंगली. या विषयावर सत्ताधारी आणि विरोधकांमध्ये आरोप-प्रत्यारोपही झाले. सभागृह नेते धनंजय काळोखे यांच्या आक्रमक भूमिकेमुळे लोणावळ्यात अतिक्रमणविरोधी मोहीम वेग घेणार का, याकडे शहरवासीयांचे लक्ष लागले आहे.