Heavy Rainfall – जिल्ह्यातील घाटमाथ्यावर पावसाने हाहाकार माजविला असून, गेल्या २४ तासांत लोणावळा, ताम्हिणी घाटमाथ्यासह भिरा, शिरगाव आणि अंबवने परिसरात ढगफुटीसदृश अतिवृष्टी झाली आहे. पावसाने रौद्ररूप धारण केल्यामुळे संपूर्ण परिसराला पुराच्या पाण्याने वेढले आहे. गेल्या अनेक वर्षांतील हा आतापर्यंतचा सर्वोच्च (उच्चांकी) पाऊस ठरला आहे. यामुळे नदी-नाले ओसंडून वाहत असून, अनेक गावांचा संपर्क तुटला आहे.

गेल्या २४ तासांत घाटमाथ्यावर पावसाने सर्व रेकॉर्ड मोडीत काढले आहेत. लोणावळ्यात सर्वाधिक तब्बल ६७० मिमी पावसाची नोंद झाली असून, संपूर्ण रस्ते आणि गावे पाण्याखाली गेली आहेत, तर ताम्हिणी घाटात ५८० मिमी आणि भिरा परिसरात ६०९ मिमी एवढा पाऊस झाला. शिरगाव आणि अंबवने भागातही धो-धो कोसळणाऱ्या पावसामुळे नद्यांनी धोक्याची पातळी ओलांडली असून, सर्वत्र महापुराचे चित्र निर्माण झाले आहे.

या अतिवृष्टीमुळे डोंगरावरून वाहत येणाऱ्या फेसाळणाऱ्या धबधब्यांनी आता रौद्ररूप धारण केले आहे. पाण्याचा वेग इतका प्रचंड आहे, की ओढे, नाले आणि नद्यांचे पाणी थेट रस्त्यांवर आले आहे. ग्रामीण भागातील अनेक पूल पाण्याखाली गेल्याने गावांचा संपर्क तुटला असून, वाहतूक आणि दळणवळण व्यवस्था पूर्णपणे ठप्प झाली. सखल भागात राहणाऱ्या शेकडो नागरिकांच्या घरांमध्ये पुराचे पाणी घुसल्याने लोकांचे संसार उघड्यावर आले आहेत.

राष्ट्रीय आपत्ती प्रतिसाद दल (एनडीआरएफ) आणि स्थानिक आपत्ती व्यवस्थापन पथकाने तात्काळ घटनास्थळी धाव घेत अडकलेल्या नागरिकांना, लहान मुलांना आणि वृद्धांना बोटीच्या साहाय्याने सुखरूप बाहेर काढले. उशिरापर्यंत पूरग्रस्त भागात युद्धपातळीवर बचावकार्य सुरू होते. दरम्यान, मुळशी घाट, ताम्हिणी घाट आणि वरंधा घाटात भलेमोठे दगड आणि मातीचे ढिगारे रस्त्यावर आल्याने हा मार्ग वाहतुकीसाठी बंद झाला आहे. प्रशासनाकडून रस्ते खुले करण्याचे काम युद्धपातळीवर सुरू असून, पाऊस आणि धुक्यामुळे अडथळे येत आहेत.

इतिहासातील उच्चांकी पाऊस
पुणे जिल्ह्यातील लोणावळा आणि ताम्हिणी घाटमाथ्यावरील २४ तासांतील उच्चांकी पावसाची नोंद झाली. लोणावळा परिसरात या एका दिवसात कधीही ५०० मिमीपेक्षा अधिक पाऊस झालेला नाही. गतवर्षीही लोणावळ्यात ४३८ हा उच्चांकी पाऊस होता. त्यामुळे सोमवारी (दि. ६) पहाटे नोंदविलेला २४ तासातील ६७० मिमी पाऊस हा इतिहासातील उच्चांकी पाऊस आहे. ताम्हिणी घाट माथ्यावर गतवर्षी २० ऑगस्टला ५७५ मिमी पाऊस झाला, तर गेल्या २४ तासांत ५८० मिमी पावसाची नोंद झाली असून, गेल्या २५ वर्षांतील हा उच्चांकी पाऊस आहे. दरम्यान, ताम्हिणी घाटात २९ जून १९९४ रोजी (३२ वर्षांपूर्वी) आतापर्यंतचा सर्वोच्च पाऊस ६९५ मिमी इतका पडला होता.

गेल्या २४ तासांतील घाटमाथ्यावरील पाऊस
लोणावळा ६७०, भिरा ६०९, ताम्हिणी ५८०, शिरगाव ५४०, अंबवने ५३७, खोपोली ५१६, दावडी ४७४, डुंगरवाडी ४५१, वळवण ४४२, मिलिमीटर.