Lionel Messi Retires From International Football Argentina FIFA World Cup 2026 : जागतिक फुटबॉल विश्वातील महान खेळाडू आणि अर्जेंटिनाचा विश्वचषक विजेता कर्णधार लिओनेल मेस्सीने (Lionel Messi) आंतरराष्ट्रीय फुटबॉलमधून निवृत्तीची अधिकृत घोषणा केली आहे. दोन दशकांहून अधिक काळ अर्जेंटिनाच्या निळ्या-पांढऱ्या जर्सीत आपल्या खेळाची जादू दाखवणारा मेस्सी आता राष्ट्रीय संघाकडून खेळताना दिसणार नाही. २०२६ च्या फिफा विश्वचषक फायनलमध्ये स्पेनविरुद्ध झालेल्या पराभवानंतर सखोल विचार करून मेस्सीने हा अत्यंत भावनिक आणि मोठा निर्णय जाहीर केला आहे.

‘माझ्याजवळ आता देण्यासारखे काही उरले नाही!’; मेस्सीची भावूक पोस्ट

इन्स्टाग्रामवर एक हृदयस्पर्शी पोस्ट शेअर करत मेस्सीने लिहिले की, “हा निर्णय माझ्या हृदयाला आतून खोलवर दुखावणारा आहे, परंतु थांबण्याची हीच योग्य वेळ असल्याचे मला जाणवले. मी माझ्या देशासाठी, या जर्सीसाठी नेहमीच सर्वस्व पणाला लावले. केवळ आम्ही सर्व जेतेपदे जिंकली तेव्हाच नव्हे, तर त्याआधीच्या कठीण काळातही मी देशवासीयांना अभिमान वाटावा यासाठी घाम गाळला. आता या जर्सीसाठी माझ्याकडे देशासाठी पुढे देण्यासारखे काही उरलेले नाही.”

 

View this post on Instagram

 

२०२२ चा फिफा विश्वचषक आणि कोपा अमेरिका जेतेपदाचा सुवर्णकाळ!

मेस्सीच्या आंतरराष्ट्रीय कारकिर्दीतील सर्वोच्च क्षण २०२२ मध्ये आला, जेव्हा त्याच्या नेतृत्वात अर्जेंटिनाने कतारमध्ये फिफा विश्वचषक जिंकून १९८६ नंतरचे ३६ वर्षांचे स्वप्न पूर्ण केले. याशिवाय त्याच्याच नेतृत्वाखाली अर्जेंटिनाने २०२१ आणि २०२४ मध्ये सलग दोन कोपा अमेरिका (Copa America) किताब पटकावले. आपल्या कारकिर्दीत ६ विश्वचषक खेळणारा मेस्सी तब्बल ३ वेळा विश्वचषकाच्या फायनलमध्ये पोहोचला. २०२६ च्या अखेरच्या विश्वचषकातही त्याने ८ गोल आणि ४ असिस्ट नोंदवत देशाला उपविजेतेपद मिळवून दिले.

हेही वाचा – Hardik Pandya Ferrari : १२ कोटींची अलिशान चमचमणारी फेरारी अन् नवा डॅशिंग लुक! हार्दिक पंड्याचा VIDEO होतोय व्हायरल

वडिलांच्या निधनानंतर मोठा निर्णय; क्लब फुटबॉल मात्र सुरूच राहणार –

याच महिन्याच्या सुरुवातीला, ८ ऑगस्ट रोजी मेस्सीचे वडील जॉर्ज मेस्सी यांचे वयाच्या ६८ व्या वर्षी निधन झाले होते. त्यानंतर मेस्सीच्या भवितव्याबाबत प्रश्न उपस्थित केले जात होते. आंतरराष्ट्रीय फुटबॉलला अलविदा केले असले, तरी ३९ वर्षीय मेस्सी अमेरिकेच्या मेजर लीग सॉकर (MLS) क्लब ‘इंटर मायामी’कडून (Inter Miami) क्लब स्तरावर खेळणे सुरूच ठेवणार आहे. इंटर मायामीसोबत त्याचा करार २०२८ च्या मोसमापर्यंत कायम आहे.