Laxmi Road Pay and Park – पश्‍चिम महाराष्ट्रातील सर्वाधिक मोठी बाजारपेठ असलेल्या लक्ष्मी रोडवरील वाहतूक कोंडी आणि अनधिकृत पार्किंगला आळा घालण्यासाठी महापालिकेने या रस्त्यावर पे अँड पार्क धोरण लागू करण्याचा प्रस्ताव तयार केला आहे. या प्रस्तावावर लक्ष्मी रोडचा कानोसा घेण्याचा प्रयत्न केला तर व्यापारी, व्यावसायिक, लोकप्रतिनिधी, कामगार आणि नागरिकांमधून संमिश्र प्रतिक्रिया येत असल्याचे जाणवले.

वर्षानुवर्षे या परिसरात व्यवसाय करणाऱ्या काही व्यावसायिकांनी पार्किंगसाठी शुल्क आकारणे अन्यायकारक असल्याचे मत व्यक्त केले तर काही जमांनी पार्किंगला शिस्त लावण्यासाठी, वाहनांची उपलब्धता सुरळीत करण्यासाठी पे अँड पार्क आवश्यक असल्याचे मत व्यक्त केले. दररोज खरेदीसाठी येणाऱ्या नागरिकांनाही या धोरणाचा आर्थिक भार सहन करावा लागणार असल्याने नाराजी व्यक्त होत आहे.

त्यामुळे नियमित व्यावसायिक आणि कामगारांसाठी पासची सुविधा द्यावी. तसेच खरेदीसाठी येणाऱ्या नागरिकांना किमान शुल्कात पार्किंगची सुविधा उपलब्ध करून द्यावी, अशीही काहीजणांची भूमिका असल्याचे दिसले. पालिकेने प्रस्ताव लागू करण्यापूर्वी सर्व घटकांशी चर्चा करून निर्णय घ्यावा, अशीही काहीजणांची अपेक्षा दिसली.

“व्‍यापाऱ्यांना विश्वासात घेऊन निर्णय घेणे योग्य होईल. पे ॲण्ड पार्क धोरण लागू करणे गरजेचे आहे. त्‍याचा व्‍यापाऱ्यांनाच फायदा होऊन नागरिकांचीही सोय होईल. नागरिकांना खरेदी करण्याच्‍या ठिकाणी वाहने लावण्याची व्‍यवस्‍था होइल. व्‍यापारी, कामगारांसाठी पालिकेचे जवळचे पार्किंग पास दिल्‍यास त्‍यांचीही गैरसोय टळेल.”
– नितीन पंडित, व्‍यापारी

“मुंबईत असे पे ॲण्ड पार्किंग अनेक ठिकाणी यशस्‍वी झाले आहे. त्‍यांच्‍याकडून योग्य सुविधाही दिल्‍या जातात. त्‍याच धर्तीवर लक्ष्मी रस्‍त्‍यावर योग्य सुविधा देऊन पे ॲड पार्किंग धोरण लागू करणे गरजेचे आहे. त्‍यामुळे वाहतूक व्‍यवस्‍थेला शिस्‍त लागेल. वाहतूक कोंडी होणार नाही. जेथे अशी सुविधा आहे तेथेच लोक वाहने उभी करतील.”
– कुणाल टिळक, नगरसेवक.

“आधी सुविधा देऊन त्‍यानंतर पे ॲण्ड पार्किंग धोरण लागू करणे योग्य राहिल. येणाऱ्या नागरिकांची आणि कायमस्‍वरूपी काम करणाऱ्या कामगार, व्‍यापाऱ्यांच्‍या खिशाला भुर्दंड पडू नये. महापालिकेने जवळ पार्किंगसाठी जागा उपलब्ध करून द्यावी. सुविधेअभावी धोरण राबविल्‍यास त्‍याला विरोध असेल.”
– राघवेंद्र उर्फ बापू मानकर, नगरसेवक.