Ladki Bahin Yojana : राज्यातील महत्त्वाकांक्षी ‘लाडकी बहीण’ योजनेवरून पुन्हा एकदा राजकारण तापले आहे. केवायसी प्रक्रिया पूर्ण न केल्यामुळे सुमारे 80 लाख महिलांची नावे लाभार्थी यादीतून वगळण्यात आल्याची माहिती समोर आल्यानंतर विरोधकांनी सरकारवर जोरदार टीका सुरू केली आहे.याच पार्श्वभूमीवर ठाकरे गटाचे नेते अंबादास दानवे यांनी आणखी 50 ते 60 लाख महिलांना योजनेतून वगळले जाऊ शकते, असा दावा करत खळबळ उडवून दिली आहे. (Ladki Bahin Yojana)

मुख्यमंत्री देवेंद्र फडणवीस यांनी मात्र याबाबत स्पष्टीकरण देताना, केवायसी न केल्यामुळे लाभार्थींची नावे तात्पुरती वगळली गेली असून त्यांना पुन्हा एकदा प्रक्रिया पूर्ण करण्याची संधी दिली जाणार असल्याचे सांगितले आहे. कोणत्याही पात्र महिलेला योजनेपासून वंचित ठेवण्याचा सरकारचा हेतू नसल्याचेही त्यांनी स्पष्ट केले. (Ladki Bahin Yojana)

दरम्यान, अंबादास दानवे यांनी सरकारवर गंभीर आरोप करत महिला व बालविकास मंत्री अदिती तटकरे यांच्या राजीनाम्याची मागणी केली आहे. सरकार विविध अटी आणि केवायसीच्या निकषांद्वारे लाभार्थ्यांची संख्या कमी करत असल्याचा आरोप त्यांनी केला. यामुळे पुढील काही महिन्यांत ही योजना केवळ नावापुरती उरेल, असा दावा त्यांनी केला. (Ladki Bahin Yojana)

याचवेळी दानवे यांनी विधानपरिषद निवडणुकीच्या पार्श्वभूमीवर महायुतीतील तणावावरही भाष्य केले. अब्दुल सत्तर यांनी व्यक्त केलेल्या नाराजीचा संदर्भ देत त्यांनी भाजप मित्रपक्षांना कमकुवत करण्याचे काम करत असल्याचा आरोप केला. तसेच भाजपने पूर्वी अनेक राज्यांमध्ये सहयोगी पक्षांचे राजकीय अस्तित्व कमी केल्याचा दावाही त्यांनी केला. (Ladki Bahin Yojana)

दरम्यान, ठाकरे गटाचे खासदार संजय राऊत यांनी शिंदे गटातील नाराज नेत्यांनी पुनर्विचार करून परत यावे, असे केलेल्या आवाहनालाही दानवे यांनी समर्थन दिले आहे. लाडकी बहीण योजनेतील लाभार्थी पडताळणी, केवायसी प्रक्रिया आणि अपात्र लाभार्थ्यांचा प्रश्न यावरून आगामी काळात राज्यातील राजकारण आणखी तापण्याची चिन्हे दिसत आहेत. (Ladki Bahin Yojana)

हेही वाचा

Ladaki Bahin Yojana : लाडकी बहिण योजनेत मोठी चूक; २४ लाख महिलांची मदत थांबली, नेमकं काय घडलं?