Kunal Kamra : विधानभवनाच्या प्रवेशद्वारावर आव्हाड आणि पडळकर यांचे कार्यकर्ते एकमेकांना भिडले. या राड्याचा व्हिडीओ सोशल मीडियावर व्हायरल झाला आहे. हाणामारीची घटना कपडे फाडण्या इथपर्यंत झाली आहे. या घटनेमुळे राज्याच्या राजकारणातही याचे पडसाद उमटल्याचे पाहायला मिळत आहे. राज्याचे उमुख्यमंत्री एकनाथ शिंदे यांच्यावर विडंबनात्मक कविता सादर करणाऱ्या कॅामेडियन कुणाला कामराने या घटनेवरून सरकारला डिवचलं आहे.

हाणामारीच्या घटनेचा व्हिडीओ त्याने एडिट करून त्याच्या एक्स अकाऊंटवरून शेअर केला आहे. या व्हिडीओतून कविता सादर करत महायुती सरकारवर टीका केली आहे. या व्हिडीओच्या बॅकग्राऊंडला त्याच्या कवितेचे बोल ऐकू येत आहेत. या कवितेतून त्याने महायुती सरकारवर जोरदार निशाणा साधला आहे.

होंगे नंगे चारो ओर, करेंगे दंगे चारो ओर..’ अशा शब्दांत त्याने या घटनेवरून महायुती सरकावरला लक्ष्य करत टीका केली आहे. या व्हि़डीओखाली त्याने कायदा मोडणारे’ असं कॅप्शन दिलं आहे. या व्हिडीओवर नेटकऱ्यांनी प्रतिक्रिया देखील दिल्या आहेत.

नेमकं काय घडलं?  

गुरूवारी १७ जुलै या दिवशी विधानभवनाच्या लॅाबीत शरद पवार गटाचे आमदार जितेंद्र आव्हाड आणि भाजप आमदार गोपीचंद पडळकर यांच्या कार्यकर्त्यांमध्ये तुफान राडा झाला. या घटनेवरून विरोधकांकडून भाजप आणि पडळकर यांच्यावर कडक शब्दांत हल्लाबोल करण्यात येत आहे. आव्हाड यांनी त्यांचा कार्यकर्ता नितीन देशमुख याला पडळकरांच्या कार्यकर्त्यांनी मारहाण केल्याचा आरोप केला आहे.

*Lawbreakers* pic.twitter.com/L8aiwvGlPw

— Kunal Kamra (@kunalkamra88) July 17, 2025

मध्यरात्री मोठा राडा 

या मारहाणीच्या घटनेनंतर विधिमंडळावर गालबोट लागल्याचे बोलले जात आहे. अशातच मध्यरात्री या घटनेला वेगळं वळणं मिळालं आहे. शरद पवार गटाचे आमदार जितेंद्र आव्हाड आणि त्यांच्या कार्यकर्त्यांनी पोलिसांच्या गाडीसमोरच ठिय्या घातला. यामुळे हे प्रकरण आता आणखी चिघळण्याची शक्यता आहे.

काय निर्णय घेणार?

विधानसभेचे अध्यक्ष राहुल नार्वेकर यांनी या संपूर्ण घटनेचा अहवाल मागविला असून, या प्रकरणात दोषींवर कठोर कारवाई केली जाईल असे त्यांनी म्हटले आहे. आज पावसाळी अधिवेशनाचा शेवटचा दिवस असून नार्वेकर या प्रकरणावर काय निर्णय घेणार हे पाहावे लागणार आहे.

हेही वाचा : ‘जसा राजा, तशी प्रजा’, तुम्ही फक्त मजा पाहत राहा! देवेंद्र फडणवीसांवर आव्हाडांची लेक संतापली