Khandala Accident – लोणंद-खंडाळा मार्गावर बिरोबा वस्ती परिसरात सोमवारी (दि. 15) रात्री 9 च्या सुमारास भरधाव पिकअप (एमएच-21-बीएच-8459) वाहनाने समोरून येणार्‍या केटीएम ड्यूक मोटारसायकल ला (एमएच-46-बीआर-8165) जोराची धडक दिली. या अपघातात वैभव अधिक माने (वय 23, रा. खेड बुद्रुक, ता. खंडाळा) याचा मृत्यू झाला. अपघातानंतर पिकअपचालकाने पलायन केले. याप्रकरणी लोणंद पोलिस ठाण्यात गुन्हा दाखल करण्यात आला आहे.

याबाबत पोलिसांनी दिलेली माहिती, लोणंद-खंडाळा मार्गावर बिरोबा वस्तीतील रामदास शेळके यांच्या घरासमोर पिकअपचालकाने पुढे असलेल्या वाहनाला ओव्हरटेक करण्याचा प्रयत्न केला. त्यावेळी समोरून आलेल्या मोटारसायकलला पिकअपची जोराची धडक बसली. या अपघातात दुचाकीवरील वैभव माने याचा मृत्यू झाला. अपघातानंतर पिकअपचालकाने पोलिसांना माहिती न देता आणि जखमीला रुग्णालयात दाखल न करता पलायन केले. अपघाताची माहिती मिळताच सहाय्यक पोलीस निरीक्षक जायपत्रे यांनी घटनास्थळी भेट दिली. याप्रकरणी सागर शिवाजी धायगुडे (वय 35, रा. खेड बुद्रुक) यांनी फिर्याद दिली असून, हवालदार तांबे तपास करत आहेत.