‘Khalid Ka Shivaji‘ : नुकताच ‘खालिद का शिवाजी‘ या चित्रपटाचा ट्रेलर यूट्यूबवर प्रदर्शित करण्यात आला आहे. मात्र, प्रदर्शनापूर्वीच चित्रपटावर बंदी घालण्याची मागणी केली जात आहे. या चित्रपटात छत्रपती शिवाजी महाराजांच्या संदर्भात काही वादग्रस्त मांडणी केल्याचा आरोप हिंदू महासंघाने केला आहे.

त्यामुळे हा चित्रपट महाराष्ट्रात प्रदर्शित करू नये, अशी भूमिका हिंदू महासंघाकडून घेण्यात आली आहे. हिंदू महासंघाने तात्काळ चित्रपटावर बंदी घालण्यात यावी, अशी मागणी केली आहे. तसे पत्र सेन्सॉर बोर्ड, या चित्रपटाच्या दिग्दर्शक आणि निर्मात्यांना पाठविण्यात आले आहे, जर हा चित्रपट प्रदर्शित केला तर थेट आंदोलनाचा इशाराही हिंदू महासंघाकडून देण्यात आला आहे. 

हा चित्रपट ८ अॅागस्ट या दिवशी चित्रपटगृहात प्रदर्शित होणार आहे. या चित्रपटाची फिल्म फेस्टिव्हसाठी निवड झाल्याचे निर्मात्यांनी जाहीर केले आहे. मात्र, हिंदू संघटनाचा चित्रपटावर बंदी घालण्यात यावी, यासाटी आक्रोश करण्यात येत आहे. या चित्रपटात शिवाजी महाराजांचा खोटा इतिहास मांडला गेला असून, त्यांचे विकृतीकरण करण्यात आले आहे, असा आरोप हिंदू महासंघाचे अनंद दवे यांनी केला आहे.

दरम्यान, खालिद का शिवाजी हा चित्रपट रिलीज होण्याअगोदर वादाच्या भोवऱ्यात सापडला असून, जर कोणी हा चित्रपट थिएटरमध्ये लावला तर तीव्र आंदोलन छेडण्यात येईल, असा इशारा देण्यात आला आहे. मात्र, अद्यापर्यंत याप्रकरणी चित्रपटाचे निर्मात्यांनी अधिकृत प्रतिक्रिया दिलेली नाही. यामुळे या चित्रपटाच्या प्रदर्शनाबाबत कोणता निर्णय चित्रपटाचे निर्माते घेतात हे पाहावे लागणार आहे.