Khalapur Shiv Sena – खालापूर तालुक्यात गेल्या काही दिवसांपासून शिवसेनेत (शिंदे गट) अंतर्गत सुरू असलेली नाराजी आणि मतभेद आता काहीसे शांत झाल्याचे चित्र दिसत आहे. तालुकाप्रमुख संदेश पाटील यांनी उघडपणे नाराजी व्यक्त करत पदाचा राजीनामा जाहीर केल्यानंतर पक्षात निर्माण झालेल्या अस्वस्थतेची दखल घेत आमदार महेंद्र थोरवे यांनी कार्यकर्त्यांची बैठक घेत परिस्थिती नियंत्रणात आणण्याचा प्रयत्न केला. या बैठकीत अनेक कार्यकर्त्यांनी आपल्या मनातील खदखद व्यक्त केल्याची चर्चा असून त्यानंतर पक्षातील वातावरण काहीसे निवळल्याचे बोलले जात आहे.

महायुतीच्या जागावाटपानुसार विधान परिषद निवडणुकीत राष्ट्रवादी काँग्रेसला जागा मिळाल्यानंतर महायुतीचा धर्म पाळत आमदार महेंद्र थोरवे यांनी राष्ट्रवादीचे प्रदेशाध्यक्ष सुनील तटकरे यांच्या समवेत अनिकेत तटकरे यांच्या उमेदवारी अर्ज दाखल करण्याच्या कार्यक्रमाला उपस्थिती लावली होती. या निर्णयाचा आधार घेत तालुकाप्रमुख संदेश पाटील यांनी संताप व्यक्त करत आपल्या पदाचा राजीनामा जाहीर केला. त्याचबरोबर त्यांनी तालुक्यात सर्वसामान्य शिवसैनिकांची होत असलेली उपेक्षा, गावपातळीवरील कामांमध्ये हस्तक्षेप आणि कार्यकर्त्यांना डावलले जात असल्याचे मुद्देही सार्वजनिकरित्या मांडले.

संदेश पाटील यांच्या भूमिकेला तालुक्यातील अनेक कार्यकर्त्यांचा प्रतिसाद मिळाला. त्यांच्या समर्थनार्थ जवळपास ४१ कार्यकर्त्यांनी राजीनामे जाहीर केल्याची चर्चा सुरू झाली आणि त्यामुळे पक्षातील नाराजी अधिक ठळकपणे समोर आली. अनेकांनी स्थानिक पातळीवरील निर्णयांमध्ये कार्यकर्त्यांना विश्वासात घेतले जात नसल्याची भावना व्यक्त केली. परिणामी हा विषय केवळ एका व्यक्तीच्या नाराजीपुरता मर्यादित न राहता संघटनात्मक प्रश्न म्हणून चर्चेत आला.

परिस्थिती अधिक चिघळू नये आणि पक्षात फूट पडू नये, यासाठी आमदार महेंद्र थोरवे यांनी कर्जत येथे निवडक कार्यकर्त्यांची बैठक आयोजित केली. या बैठकीत त्यांनी महायुतीतील निर्णय वरिष्ठ नेतृत्वाच्या सूचनेनुसार घेतले जात असल्याचे स्पष्ट केले. राष्ट्रवादीच्या कार्यक्रमाला उपस्थित राहणे हा वैयक्तिक निर्णय नसून महायुतीचा धर्म पाळण्याचा भाग असल्याचे त्यांनी कार्यकर्त्यांना सांगितल्याची माहिती समोर आली आहे. बैठकीदरम्यान कार्यकर्त्यांनीही आपल्या अडचणी आणि नाराजी व्यक्त केल्याची चर्चा आहे.

गावपातळीवरील कामे, स्थानिक विकास प्रकल्पांमध्ये संधी, संघटनात्मक समन्वय आणि कार्यकर्त्यांना मिळणारे महत्त्व यासंदर्भातील अनेक मुद्दे बैठकीत मांडण्यात आल्याचे सांगितले जात आहे. यावेळी आमदार थोरवे यांनी सर्व प्रश्न समजून घेत त्यावर योग्य तो मार्ग काढण्याचे आश्वासन दिले. कर्जत-खालापूर मतदारसंघात राष्ट्रवादी काँग्रेस (अप) आणि शिवसेना (शिंदे गट) यांच्यातील राजकीय समीकरणे आधीपासूनच चर्चेत आहेत. अशा परिस्थितीत पक्षांतर्गत मतभेद उघडपणे समोर आल्याने विरोधकांनाही टीकेची संधी मिळाली होती. मात्र बैठकीनंतर पक्ष नेतृत्वाने परिस्थिती हाताळण्याचा प्रयत्न केल्याने मोठा वाद टळल्याचे मानले जात आहे.