Discussions regarding the merger of the Nationalist Congress Party (NCP) :  सीजेपीचं आंदोलन संपल्यानंतर आता पुन्हा दोन्ही राष्ट्रवादी काँग्रेसच्या विलिनीकरणाच्या चर्चांना वेग आला आहे. बुधवारी दिल्लीत ज्येष्ठ नेते शरद पवार यांनी देशाचे पंप्रधान नरेंद्र मोदी यांची भेट घेतली. या भेटीनंतर शरद पवारांची राष्ट्रवादी एनडीएसोबत सत्तेत सहभागी होणार असल्याच्या चर्चेंना उकळी फुटली आहे.

पार्थ पवार आणि नेते प्रफुल पटेल यांनी घेतली शरद पवारांची भेट  (NCP Merger Talks )

मात्र, शरद पवारांनी मोदींची भेट नेमकी कोणत्या कारणासाठी घेतली याविषयी स्पष्टीकरण दिले होते. अशातच दुसऱ्या दिवशी राष्ट्रवादी काँग्रेस पक्षाच्या दोन बड्या नेत्यांनी दिल्लीत शरद पवारांची भेट घेतल्याची मोठी माहिती समोर आली आहे. यामुळे विलिनीकरणाला अनुसरुन घडामोडी घडत असल्याची चर्चा आहे. राष्ट्रवादी काँग्रेस पक्षाचे खासदार पार्थ पवार आणि नेते प्रफुल पटेल यांनी शरद पवारांची भेट घेतली. या भेटीचा तपशील समोर आलेला नाही.

या चर्चा होत असतानाच भाजप नेते मंत्री जयकुमार गोरे यांनी केलेले सूचक विधान आणि उबाठा गटाचे नेते खासदार संजय राऊत यांनी शरद पवार यांच्याविषयी दिलेली प्रतिक्रिया चर्चेच्या केंद्रस्थानी आहे. तसेच राष्ट्रवादी काँग्रेस पक्षाचे नेते प्रदेशाध्यक्ष सुनील तटकरे आणि शरद पवार यांच्या राष्ट्रवादी काँग्रेस पक्षाच्या खासदार सुप्रिया सुळे यांनी नुकतीच घेतलेली केंद्रीय मंत्री अमित शाह यांची भेट देखील चर्चेचा विषय ठरत आहे.

जयकुमार गोरे यांचं सूचक वक्तव्य  ( NCP Merger Talks)

याप्रकरणी जयकुमार गोरे यांनी थेट भाष्य केले नसले तरी मोठे संकेत दिले आहेत.”एनडीए म्हणून आम्ही एकसंध आहोत. माझ्या माहितीप्रमाणे एनडीएमध्ये एखादा दुसरा पक्ष वाढतोय पण कमी होण्याची शक्यता नाही. काहीजण बातम्या चालवत आहेत आणखी काही ऍडिशन होणार आहे डिलिशन नाही, असे सूचक वक्तव्य मंत्री गोरे यांनी केले आहे.

संजय राऊतांचं मोठं वक्तव्य  (NCP Merger Talks)

तर संजय राऊत यांनी मोठं वक्तव्य केलं आहे. ते म्हणाले “शरद पवार आणि सुप्रिया सुळे ज्या राष्ट्रवादी काँग्रेस पक्षाचं नेतृत्व करतात ओरिजनल. मी खात्रीने सांगतो ते जातीयवादी, राष्ट्रविघातक पक्षांसोबत कधी जाणार नाहीत, म्हणजे भाजपंसोबत. मी पवारसाहेबांची जी विचारधारा पाहतो त्यात नरेंद्र मोदी बसत नाहीत.”

…त्यानंतरच एनडीएमध्ये प्रवेश द्यावा

मतदारसंघ पुनर्रचना विधेयकाच्या पार्श्वभूमीवर राष्ट्रवादी काँग्रेस (शरदचंद्र पवार) पक्ष एनडीएमध्ये सहभागी होणार असल्याच्या चर्चांचा जोर पुन्हा एकदा वाढला आहे. भाजपच्या वरिष्ठ नेतृत्वाने शरद पवार यांच्या राष्ट्रवादीने प्रथम अजित पवार यांच्या राष्ट्रवादी काँग्रेसमध्ये विलीन व्हावे आणि त्यानंतरच एनडीएमध्ये प्रवेश द्यावा, अशी अट घातल्याची माहिती सूत्रांच्या हवाल्याने समोर आली होती. मात्र, या संभाव्य विलिनीकरणाला सुनेत्रा पवार यांनी विरोध दर्शवल्याचीही राजकीय वर्तुळात चर्चा आहे.

सुळे आणि तटकरेंनी घेतली अमित शाहांची भेट 

रेवती सुळे आणि सारंग लखानी यांच्या लग्नानंतर १० ऑगस्टला दिल्लीत रिसेप्शन पार पडणार आहे. सुप्रिया सुळे या सोहळ्याचे निमंत्रण देण्यासाठी सोमवारी अमित शाह यांना भेटल्या होत्या. तर देशाचे केंद्रीय गृहमंत्री अमित शाह यांची आज नवी दिल्ली येथे सदिच्छा भेट घेऊन विविध विषयांवर चर्चा केली, अशी पोस्ट भेटीनंतर सुनील तटकरे यांनी शेअर केली. मात्र, या भेटीत संभाव्य राजकीय समीकरणांवर चर्चा झाल्याची सूत्रांनी माहिती दिली. त्यामुळे पुढं विलिनीकरणाच्या दिशेने कोणतं पाऊल उचललं जातं याकडे लक्ष असणार आहे.

CJP protest: फेसबुकने पंतप्रधान मोदींच्या व्हिडिओवर घातली बंदी ; गोंधळानंतर दिले ‘हे’ स्पष्टीकरण