Jatra 2: २००५ साली आलेला ‘जत्रा’ हा मराठी चित्रपट आजही लोक विसरलेले नाहीत. गावोगावी अजूनही त्यातील गाणी, डायलॉग्स आणि मजेदार सीन्स आवडीने म्हटले जातात. त्यामुळे या चित्रपटाचा दुसरा भाग येणार का, असा प्रश्न प्रेक्षक सतत विचारत असतात.

काही वर्षांपूर्वी ‘जत्रा २’ची घोषणा करण्यात आली होती. मात्र पुढे त्याबद्दल काहीच माहिती समोर आली नाही. नुकत्याच दिलेल्या मुलाखतीत दिग्दर्शक केदार शिंदेंनी याबद्दल स्पष्ट सांगितलं.

ते म्हणाले, “‘जत्रा २’ची कथा माझ्याकडे तयार होती. पण भरत जाधवने मला थांबायला सांगितलं. त्याला वाटलं की ही कथा दुसऱ्या एका सिनेमाशी मिळतीजुळती आहे. मी तपास केला तर खरंच काही भाग सारखा होता. त्यामुळे आम्ही तो सिनेमा पुढे नेला नाही.”

यानंतर ते पुढे म्हणाले, “आज ‘जत्रा २’ करायचा म्हटलं तर पुन्हा सगळं नव्यानं पाहावं लागेल. त्या वेळी आम्ही अनुभव नसलेले होतो, पण जोश खूप होता. आता समज वाढली आहे, पण तो अवखळपणा कमी झाला. प्रेक्षकांना मात्र तोच उत्स्फूर्तपणा आवडतो.”

केदार शिंदेंनी स्पष्ट केलं, “मनापासून मला ‘जत्रा २’ करायचा आहे. पण ‘जत्रा’ने जी उंची गाठली आहे, तसाच दुसरा भाग पोहोचला नाही तर ब्रँडची किंमत कमी होईल. त्यामुळे घाईघाईत निर्णय घ्यायचा नाही.”

थोडक्यात, ‘जत्रा २’ होणारच नाही असं नाही, पण ती कथा ‘जत्रा’इतकी ताकदीची असली पाहिजे, अन्यथा सिनेमा सुरू करण्याचा धोका घेणार नाही, असं केदार शिंदेंनी सांगितलं.