Dashavatar Movie : १२ सप्टेंबर या दिवशी मराठीतील कांतारा अशी उपमा देण्यात आलेल्या दशावतार हा सिनेमा रिलीज झाला आहे. गेल्या काही दिवसांपासून या सिनेमाची जोरदार चर्चा होती. अखेर हा सिनेमाा प्रेक्षकांच्या भेटीला आला आहे. हा सिनेमा पाहिल्यानंतर प्रेक्षकांच्या प्रतिक्रिया समोर येत असून, प्रेक्षक ज्येष्ठ अभिनेते दिलीप प्रभावळकरांच्या अभिनयाचं  तोंडभरून कौतुक करत आहेत.

नुकताच माझा कट्यावर या सिनेमात मुख्य भूमिका साकारणारे ज्येष्ठ अभिनेते दिलीप प्रभावळकर, संवाद लेखक गुरू ठाकूर आणि दिग्दर्शक सुबोध खानोलकर यांनी हजेरी लावली होती. यावेळी दिग्दर्शकाने मोठा खुलासा केला आहे. या सिनेमात मुख्य भूमिकेसाठी दिलीप प्रभावळकर यांच्यासोबतच साऊथ सुपरस्टार रजनीकांत यांच्या नावाचाही विचार झाल्याची चर्चा होती. यावर दिग्दर्शक सुबोध खानोलकर यांनी भाष्य करत खास उत्तर दिलं आहे.

काय म्हणाले खानोलकर?

जर ‘दशावतार’ सिनेमाला दिलीप प्रभावळकरांनी नकार दिला तर ही गोष्ट गुंडाळून ठेवायची. कारण, ही गोष्ट इतर कोणीही सादर करू शकत नाही, हे आधीच ठरलं होतं, असं स्पष्टपणे सुबोध खानोलकर यांनी सांगितलं. तसेच रजनीकांत नाव कुठून आलं माहित नाही. पण, माझ्यासाठी दिलीप प्रभावळकर सर हे मराठीतील रजनीकांतपेक्षा कमी नाहीत. रजनीकांत वगैरे असा विचार आम्ही केला नव्हता, असंही खानोलकर यांनी स्पष्ट केलं.

या सिनेमात दिलीप प्रभावळकर यांनी दशावतार करणाऱ्या बाबुलीची व्यक्तीरेखा साकारली आहे. ही भूमिका तशी कठीण होती. हे सगळं प्रभावीपणे करू शकणारं दिलीप प्रभावळकर सर सोडून दुसरं कुणीच डोक्यात नव्हतं. त्यामुळे मी दिलीप प्रभावळकरांना विचारलं आणि पटकथा लिहायच्या आधीच मला त्यांच्याकडून होकार मिळाला, असंही सुबोध खानोलकर यांनी सांगितलं .

१२ सप्टेंबर या दिवशी बॅाक्स अॅाफिसवर तीन मराठी सिनेमे रिलीज झाले आहेत. यापैकी दशावताने पहिल्याच दिवशी ६३ लाखांची कमाई करत आता नव्या माहितीनुसार १ कोटींचा टप्पा ओलांडला आहे. या सिनेमात ज्येष्ठ अभिनेते दिलीप प्रभावळकर यांच्यासोबत सिद्धार्थ मेनन, भरत जाधव, विजय केंकरे, सुनील तावडे, रवी काळे, लोकेश मित्तल, आरती वडगबाळकर, अभिनय बेर्डे, प्रियदर्शनी इंजलकर यांच्याही महत्त्वाच्या भूमिका आहेत.

हेही वाचा : “ते गायीला प्राणी मानत नाहीत” ; पंतप्रधान मोदींचे महत्वाचे विधान