IPL 2024 (CSK vs PBKS Match 49) : चेन्नईला पराभवाचा धक्का, पंजाबने 7 विकेट्स राखून मिळवला विजय…
IPL 2024 (CSK vs PBKS Match 49 Result ) : आयपीएल 2024 मधील 49 व्या सामन्यात बुधवारी(1मे) चेन्नई सुपर किंग्ज (CSK) आणि पंजाब किंग्ज आमने-सामने होते. दोन्ही संघांमधील हा सामना चेन्नईच्या होम ग्राउंड चेपॉकवर खेळला गेला. या सामन्यात पंजाब किंग्जने चेन्नई सुपर किंग्जचा 7 विकेट्सने पराभव केला आहे. जॉनी बेअरस्टो आणि रिले रुसो यांच्या शानदार खेळीमुळे पंजाबने 13 चेंडू शिल्लक असताना सामना जिंकला.
चेन्नईने प्रथम फलंदाजी करताना कर्णधार रुतुराज गायकवाडच्या 62 धावांच्या जोरावर 20 षटकांत सात गडी गमावून 162 धावा केल्या होत्या.प्रत्युत्तरात पंजाबकडून बेअरस्टोने 30 चेंडूंत सात चौकार आणि एक षटकाराच्या मदतीने 46 धावा केल्या तर रिले रॉसोने 23 चेंडूंत पाच चौकार आणि दोन षटकारांच्या मदतीने 43 धावा केल्या, ज्याच्या जोरावर पंजाबने 17.5 षटकात तीन गड्यांच्या मोबदल्यात 163 धावा करून विजय मिळवला.करण 20 चेंडूत तीन चौकारांच्या मदतीने 26 धावा करून नाबाद तर शशांक 26 चेंडूत एक चौकार आणि एका षटकाराच्या मदतीने 25 धावा करून नाबाद माघारी परतला.इम्पॅक्ट प्लेअर म्हणून मैदानात उतरलेल्या प्रभसिमरन सिंगला रिचर्ड ग्लीसनने बाद केले. ग्लीसनची आयपीएलमधील ही पहिली विकेट आहे. प्रभसिमरन 13 धावा करून बाद झाला.
चेन्नईकङून गोलंदाजीत शार्दुल ठाकूर आणि रिचर्ड ग्लीसन यांनी प्रत्येकी एक विकेट घेतली. शिवम दुबेने IPL 2024 मध्ये पहिल्यांदा गोलंदाजी केली आणि पहिल्याच षटकात त्याने जॉनी बेअरस्टोची विकेटही घेतली.
केकेआरचा पराभव केल्यानंतर पंजाबने चेन्नईला घरच्या मैदानावर पराभूत केले आहे. पराभवानंतरही चेन्नईचा संघ 10 गुणांसह गुणतालिकेत चौथ्या स्थानावर कायम आहे, तर पंजाबला दोन सामने जिंकण्याचा फायदा झाला असून संघ आठ गुणांसह सातव्या स्थानावर आला आहे. यासह पंजाबने प्ले ऑफमध्ये पोहोचण्याची शक्यता जिवंत ठेवली आहे.
तत्पूर्वी, पंजाब किंग्जने नाणेफेक जिंकून प्रथम गोलंदाजी करण्याचा निर्णय घेतला. नाणेफेक हरल्यानंतर प्रथम फलंदाजी करताना चेन्नई सुपर किंग्जने 20 षटकात सात विकेट्स गमावताना 162 धावा केल्या. पहिल्या विकेटसाठी 64 धावांची भागीदारी करूनही सीएसकेला मोठी धावसंख्या उभारण्यात अपयश आले. चेन्नईकडून कर्णधार रुतुराज गायकवाडने सर्वाधिक धावा केल्या. त्याने 48 चेंडूत 62 धावा केल्या आणि या खेळीत 5 चौकार आणि 2 षटकारांचा समावेश होता.
Our bowlers 𝐫𝐨𝐚𝐫𝐞𝐝 at Anbuden! 🦁
Let’s get the job done! 💪🏻#SaddaPunjab #PunjabKings #JazbaHaiPunjabi #TATAIPL2024 #CSKvPBKS pic.twitter.com/hfsR3a5C8E
— Punjab Kings (@PunjabKingsIPL) May 1, 2024
दुसरीकडे, अजिंक्य रहाणेने 24 चेंडूत 29 धावा करत चेन्नईला चांगली सुरुवात करून दिली. शिवम दुबे आणि रवींद्र जडेजा बॅटने कोणतीही जादू दाखवू शकले नाहीत, पण युवा फलंदाज समीर रिझवीने दबावाखाली 21 धावांची खेळी करत सीएसकेला संकटाच्या परिस्थितीतून सोडवले. पंजाबकडून अतिशय तगडी गोलंदाजी होती, पण शेवटच्या 5 षटकांमध्ये अर्शदीप सिंगपासून ते हर्षल पटेलपर्यंत सर्वांचीच धुलाई झाली.
चेन्नई संघाने पॉवरप्ले ओव्हर्समध्ये एकही विकेट न गमावता 55 धावा केल्या होत्या. पण क्षेत्ररक्षण उघडताच धावांचा वेग मंदावला होता. मधल्या षटकांमध्ये संघाला केवळ 47 धावा करता आल्या. म्हणजेच पॉवरप्ले संपल्यानंतर सीएसकेच्या फलंदाजांना 54 चेंडूत केवळ 47 धावा करता आल्या, त्यामुळे 15 षटकांत 3 गडी गमावून 102 धावा झाल्या होत्या. मधल्या षटकांमध्ये सीएसकेच्या खेळाडूंना एकही चौकार मारता आला नाही हे आश्चर्यकारक होते. यानंतर पुढील 3 षटकांत 44 धावा झाल्यामुळे फलंदाजीत आक्रमकता दिसून आली. 18 षटकांत सीएसकेने 146 धावांपर्यंत मजल मारली होती. शेवटच्या षटकांमध्ये एमएस धोनीने 11 चेंडूत 14 धावांची खेळी करत चेन्नईला 162 धावांपर्यंत नेले.
पंजाबची गोलंदाजी…
राहुल चहर पंजाब किंग्जकडून खूप घातक गोलंदाज ठरला कारण त्याने 4 षटकात फक्त 16 धावा देत 2 बळी घेतले. तर हरप्रीत ब्रारने 4 षटकात 17 धावा देत 2 बळी घेतले. दरम्यान, कागिसो रबाडा आणि अर्शदीप सिंग प्रत्येकी एक विकेट घेण्यात यशस्वी झाले. अर्शदीपने आपल्या 4 षटकात 52 धावा दिल्या, त्यामुळे चेन्नईला 160 धावांचा टप्पा पार करण्यात यश आले. तर कर्णधार सॅम करन खूप महागडा ठरला, त्याने 3 षटकात 37 धावा दिल्या.
