नवी दिल्ली – पश्चिम आशियात सुरू असलेल्या युद्धादरम्यान कतारने द्रवीभूत नैसर्गिक वायू (एलएनजी) उत्पादन थांबवले आहे. यामुळे भारताला होणारा पुरवठा विस्कळीत झाला आहे. इराण आणि इस्रायल-अमेरिका यांच्यातील संघर्षाचा सर्वात मोठा फटका ऊर्जा क्षेत्राला बसला आहे. यामुळे विविध औद्योगिक ग्राहक आणि शहरी गॅस वितरण (सीजीडी) कंपन्यांसाठी पुरवठ्यात ४० टक्क्यांपर्यंत कपात करण्यात आली आहे. जगातील सर्वात मोठा एलएनजी निर्यातदार देश असलेल्या कतारने उत्पादनावर तात्पुरती बंदी घातल्याची घोषणा केली. इराणच्या ड्रोन हल्ल्यात कतारच्या दोन मुख्य प्रोसेसिंग प्लांटना लक्ष्य करण्यात आले. त्यानंतर कतार एनर्जीने खबरदारीचा उपाय म्हणून रस लाफान प्लांटमधील उत्पादन थांबवले आहे. सध्या देशातील टंचाई लक्षात घेता शहरी गॅस कंपन्यांवर देखील कपात लागू करण्यात आली आहे. यामुळे ऑटोमोबाइल्ससाठी सीएनजी आणि घरांसाठी पाईपद्वारे स्वयंपाकाच्या गॅसची आवश्यकता पूर्ण करण्यासाठी घरगुती गॅस आणि एलएनजीच्या उपलब्धतेबद्दल चिंता व्यक्त केली आहे. दरम्यान, जगाच्या एकूण गॅस पुरवठ्यापैकी २० टक्के हिस्सा एकटा कतार सांभाळतो. भारत आखाती देशातून 80 ते 85 टक्के एलपीजीची आयात करतो. विशेष म्हणजे, भारत दरवर्षी आयात करत असलेल्या २७ दशलक्ष टन एलएनजीपैकी ४० टक्के एलएनजी कतार पुरवतो.
