Indapur News – ग्रामीण भागातील महिलांना आर्थिकदृष्ट्या सक्षम करण्यासाठी राबविण्यात येणार्या ‘उमेद’ महाराष्ट्र राज्य ग्रामीण जीवनोन्नती अभियानामुळे स्वयंसहाय्यता समूहांच्या माध्यमातून महिलांच्या सशक्तीकरणाला नवे बळ मिळत आहे. मोलमजुरी करणार्या महिला आज उद्योग-व्यवसाय उभारत स्वतःची वेगळी ओळख निर्माण करताना दिसत आहेत. इंदापूर तालुक्यातील सणसर येथील अस्मिता महिला प्रभाग संघामार्फत स्थापन करण्यात आलेल्या रणमर्दिनी महिला शेतकरी उत्पादक कंपनी लिमिटेडच्या मका भरडा प्रक्रिया युनिटचे भूमिपूजन तसेच अवजार बँकेचे उद्घाटन उत्साहात पार पडले. पंचायत समिती इंदापूरचे गटविकास अधिकारी सचिन खुडे यांच्या हस्ते प्लांट उभारणीसाठीच्या जागेचे भूमिपूजन करण्यात आले. उमेद अभियानाच्या माध्यमातून घोट्याश्या परिसरातील महिला आत्मनिर्भरतेकडे वाटचाल करताना दिसत आहेत. अस्मिता महिला प्रभाग संघाच्या कार्यक्षेत्रातील सुमारे 20 गावांतील महिलांना अवजार बँकेच्या माध्यमातून शेतीपूरक कामे व रोजगाराच्या संधी उपलब्ध होणार आहेत. या उपक्रमामुळे महिलांना सामूहिक उद्योग उभारणीची संधी मिळत असून ग्रामीण अर्थव्यवस्थेलाही चालना मिळणार आहे. यावेळी गटविकास अधिकारी सचिन खुडे म्हणाले, महिलांना योग्य मार्गदर्शन व पाठबळ मिळाल्यास त्या मोठी झेप घेऊ शकतात. ग्रामविकास विभागाच्या उमेद अभियानामुळे महिलांनी उद्योग, शेती प्रक्रिया व व्यवसायाच्या नव्या वाटा शोधल्या आहेत. सणसर येथील रणमर्दिनी महिला शेतकरी उत्पादक कंपनी हे महिलांच्या सामूहिक ताकदीचे उत्तम उदाहरण आहे. या कार्यक्रमास तालुका अभियान व्यवस्थापक सचिन बाबर, तालुका व्यवस्थापिका राणी ननवरे, प्रभाग समन्वयक डी. जे. राऊत, ग्रामविकास अधिकारी अरुण जाधव, प्रभाग संघाच्या अध्यक्षा कोमल मोरे, कंपनीचे संचालक, सल्लागार, ग्रामसखी, लिपिका तसेच महिला सभासद मोठ्या संख्येने उपस्थित होत्या. उमेद अभियानाच्या माध्यमातून ग्रामीण महिलांना उद्योग, शेतीपूरक व्यवसाय आणि स्वावलंबनाचा मार्ग मिळत असून महिला सशक्तीकरणाच्या दिशेने इंदापूर तालुक्यात नवे प्रेरणादायी चित्र निर्माण होत आहे.
