Shree Vighnahar Ganapati Temple : अष्टविनायकांपैकी एक महत्त्वाचे तीर्थक्षेत्र असलेल्या श्री विघ्नहर गणपती देवस्थान ट्रस्ट, श्रीक्षेत्र ओझर येथे गुरुवार, दि. २९ ऑक्टोबर रोजी संकष्टी चतुर्थीनिमित्त विविध धार्मिक कार्यक्रमांचे आयोजन करण्यात आले.

यानिमित्त हजारो भाविकांनी विघ्नहरच्या दर्शनाचा लाभ घेतला. श्री विघ्नहर गणपती बाप्पाच्या समोर फुलांची आकर्षक आरास करण्यात आली होती.

संकष्टी चतुर्थीनिमित्त मंदिर पहाटे ५ वाजता उघडल्यानंतर श्री विघ्नहर गणपती बाप्पाचा विधिवत धार्मिक कार्यक्रमाच्या आयोजनात देवस्थान ट्रस्टचे अध्यक्ष बाळकृष्ण कवडे, उपाध्यक्ष तुषार कवडे, सचिव सुनील घेगडे, खजिनदार दत्तात्रय कवडे यांच्या वतीने अभिषेक करण्यात आला.

त्यानंतर भाविकांनी श्रींचे दर्शन घेतले. दिवसभर दर्शनासाठी येणाऱ्या भाविकांची वर्दळ मंदिरात पाहायला मिळाली. देवस्थान ट्रस्टच्या वतीने दर्शनासाठी आलेल्या भाविकांना खिचडीचे वाटप करण्यात आले.

कीर्तन व महाआरतीचे आयोजन

संकष्टी चतुर्थीनिमित्त ह.भ.प. लक्ष्मण महाराज मुरकुटे, जुन्नर यांचे कीर्तन आयोजित करण्यात आले. त्यांच्या कीर्तनातून भाविकांना भक्ती, श्रद्धा आणि अध्यात्माचा संदेश मिळाला. त्यानंतर श्रींची महाआरती भक्तिमय वातावरणात पार पडली.सायंकाळी ७ वाजता कुकडी नदि तिरावर गंगा आरती करण्यात आली.

महाआरतीचे मानकरी

या संकष्टी चतुर्थीनिमित्त महाआरतीचा मान तुकाराम माळवदे, दीनानाथ नाईक, अनिल घरत, ज्योतीराम जाधव, अमरजीत अभंग आणि सुभाष काळे यांना मिळाला. संकष्टी चतुर्थीनिमित्त अन्नदानाची सेवा विलास मांडे व भास्कर देवराम मांडे यांनी केली.

संकष्टी चतुर्थीनिमित्त श्री विघ्नहर गणपती मंदिरात भक्तिमय वातावरण निर्माण झाले होते. श्रींचे दर्शन, धार्मिक विधी, कीर्तन आणि भाविकांसाठी करण्यात आलेल्या खिचडी वाटपामुळे संकष्टी चतुर्थीचा सोहळा श्रद्धा व भक्तिभावाने साजरा झाला.