Australia vs India 2nd Test | – पहिल्या कसोटीतील मोठ्या विजयाने उत्साही झालेला भारतीय संघ, शुक्रवारपासून सुरू होणाऱ्या दुसऱ्या कसोटी क्रिकेट सामन्यात विजयी मोहीम सुरूच ठेवताना गुलाबी चेंडूने आपला विक्रम सुधारण्यासाठी निश्चित प्रयत्न करेल. या सामन्यात कर्णधार रोहित शर्माच्या फलंदाजीवरही लक्ष ठेवले जाणार असून तो कदाचित मधल्या फळीत देखील फलंदाजी करू शकतो. वैयक्तिक कारणांमुळे पहिल्या कसोटी सामन्यात खेळू न शकलेला रोहित आणि दुखापतीतून सावरल्यानंतर पुनरागमन करणारा शुबमन गिल यांच्यासाठी फलंदाजी क्रमवारीत स्थान निश्चित करणे भारतीय संघ व्यवस्थापनाला सोपे जाणार नाही.

भारतीय संघाने पर्थ येथील पहिल्या कसोटी सामन्यात सर्व प्रतिकूल परिस्थिती असतानाही चमकदार कामगिरी केली आणि बॉर्डर गावस्कर करंडक स्पर्धेसाठी खेळल्या जाणाऱ्या पाच सामन्यांच्या मालिकेत 295 धावांचा विक्रमी विजय मिळवला. भारतीय संघाने ऑस्ट्रेलियाविरुद्ध त्यांच्याच भूमीवर चांगली कामगिरी करण्याची ही पहिलीच वेळ नाही. यापूर्वी दोन वेळा ऑस्ट्रेलियाला त्यांच्याच भूमीवर मालिकेत पराभूत केले होते. ऑस्ट्रेलियाच्या शेवटच्या दौऱ्यात, भारतीय संघ ॲडलेडमध्ये खेळल्या गेलेल्या दिवस-रात्र कसोटी क्रिकेट सामन्यात पहिल्या डावात 36 धावांवर बाद झाला होता, परंतु त्यानंतर भारताने दमदार पुनरागमन केले आणि मालिकेत ऐतिहासिक विजय मिळविला.

गुलाबी चेंडू आणि ऑस्ट्रेलिया

दिवस-रात्र कसोटी सामना मात्र भारतीय फलंदाजांसमोर वेगळ्या प्रकारचे आव्हान उभे करेल. गुलाबी चेंडू अतिरिक्त स्विंग प्रदान करतो. यावर मात करण्यासाठी भारतीय फलंदाजांना सर्वोत्तम कामगिरी करावी लागेल. दिवस-रात्र कसोटी सामन्यांमध्ये ऑस्ट्रेलियाचा विजयाचा स्ट्राईक रेट चांगला आहे. त्यांनी घरच्या भूमीवर आतापर्यंत खेळलेल्या १२ दिवस-रात्र कसोटी सामन्यांपैकी केवळ एका सामन्यात त्याला पराभवाचा सामना करावा लागला आहे, परंतु यावेळी पहिल्या कसोटी सामन्यातील दारुण पराभवामुळे त्याचा संघ दडपणाखाली असेल.

रोहित मधल्या फळीत खेळणार

भारतीय फलंदाजी क्रमवारीत बदल होणे जवळपास निश्चित आहे. कॅनबेरा येथे खेळला जाणारा सराव सामना जर काही संकेत असेल तर रोहित मधल्या फळीत खेळणार आहे. चांगल्या फॉर्ममध्ये असलेले यशस्वी जैस्वाल आणि केएल राहुल डावाची सुरुवात करतील. रोहितने 2019 पासून सलामीच्या फलंदाजाची भूमिका निभावण्यास सुरुवात केली, ज्यामुळे त्याच्या कसोटी कारकिर्दीला नवी दिशा मिळाली पण तो संघाच्या हितासाठी येथे महत्त्वाचे निर्णय घेऊ शकतो. रोहितची फलंदाजी कशीही असली तरी न्यूझीलंडविरुद्धच्या मायदेशातील मालिकेत त्याने चांगली कामगिरी न केल्यामुळे तो मोठी धावसंख्या करण्यासाठी आतुर असेल. याशिवाय त्याचा ऑस्ट्रेलियातील रेकॉर्डही चांगला नाही आणि तो सुधारू इच्छितो.

पडिक्कल, जुरेलला संधी मिळेल ?

रोहित आणि गिल अंतिम ११ मध्ये देवदत्त पडिक्कल आणि ध्रुव जुरेलची जागा घेतील. अंगठ्याच्या दुखापतीतून सावरल्यानंतर पुनरागमन करणारा गिल सराव सामन्यात चांगल्या फॉर्ममध्ये दिसत होता. त्याचा ऑस्ट्रेलियातील रेकॉर्ड चांगला आहे. पहिल्या कसोटी सामन्यात भारतासाठी सर्वात सकारात्मक बाबी म्हणजे जयस्वाल आणि विराट कोहलीची शतके. हे दोन्ही फलंदाज त्यांचा फॉर्म कायम ठेवण्याचा प्रयत्न करतील. भारतीय गोलंदाजीत बदल होण्याची शक्यता नाही. तथापि, ॲडलेडची खेळपट्टी फिरकीपटूंना मदत करत आहे आणि खेळपट्टीचा आढावा घेतल्यानंतर, तिची स्थिती पाहता, रविचंद्रन अश्विन किंवा रवींद्र जडेजा यांचा संघात समावेश केला जाऊ शकतो.

IND vs AUS : बुमराहला ॲडलेडमध्ये इतिहास रचण्याची संधी, झहीर आणि कुंबळेला ‘या’ बाबतीत टाकू शकतो मागे…

ऑस्ट्रेलियाची डोकेदुखी

ऑस्ट्रेलियाचा दृष्टिकोनातून प्रमुख फलंदाजांचा फॉर्म हा चिंतेचा विषय आहे. त्यांना मालिकेत बरोबरी साधायची असेल, तर स्टीव्ह स्मिथ, उस्मान ख्वाजा आणि मार्नस लॅबुशेनसारख्या फलंदाजांना सर्वोत्तम कामगिरी करावी लागेल. ऑस्ट्रेलियाची चिंता केवळ फलंदाजीपुरती मर्यादित नाही. त्याचा वेगवान गोलंदाज जोश हेझलवूड दुखापतीमुळे बाहेर आहे. त्याच्या जागी स्कॉट बोलंडचा संघात समावेश करण्यात आला आहे. बोलंड सुमारे १८ महिन्यांनंतर पहिला कसोटी सामना खेळणार आहे. मात्र तो ऑफ-स्टंपच्या बाहेर सातत्याने गोलंदाजी करण्यात माहीर असल्याने तो भारतीय फलंदाजांना अडचणीत आणू शकतो.

PAK vs ZIM : पाकिस्ताननं टी-20 क्रिकेटमध्ये नोंदवला विश्वविक्रम, ‘अशी’ कामगिरी करणारा ठरला जगातील पहिला संघ…

संघ खालीलप्रमाणे.. 

ऑस्ट्रेलिया इलेव्हन : पॅट कमिन्स (कर्णधार), स्कॉट बोलँड, ॲलेक्स कॅरी, ट्रॅव्हिस हेड, उस्मान ख्वाजा, मार्नस लॅबुशेन, नॅथन लियॉन, मिच मार्श, नॅथन मॅकस्वीनी, स्टीव्ह स्मिथ, मिचेल स्टार्क.

भारत : रोहित शर्मा (कर्णधार), जसप्रीत बुमराह, यशस्वी जैस्वाल, केएल राहुल, अभिमन्यू ईश्वरन, देवदत्त पडिक्कल, शुभमन गिल, विराट कोहली, ऋषभ पंत, सरफराज खान, ध्रुव जुरेल, रविचंद्रन अश्विन, रवींद्र जडेजा, मोहम्मद सिराज, आकाशदीप, प्रसिद्ध कृष्णा, हर्षित राणा, नितीशकुमार रेड्डी, वॉशिंग्टन सुंदर.