Tanmay Balouda Record : भारताच्या १८ वर्षीय फिरकीपटूचा ऐतिहासिक पराक्रम! टिम साऊदीचा १९ वर्षांचा वर्ल्ड रेकॉर्ड मोडत रचला नवा इतिहास
Tanmay Balouda Record : भारताच्या दौऱ्यावर असलेल्या ऑस्ट्रेलियाच्या १९ वर्षांखालील संघाला दुसऱ्या युवा कसोटी सामन्यात तीन दिवसांच्या आत १० गडी राखून एकतर्फी पराभव पत्करावा लागला, ज्यामध्ये भारतीय संघाचा भाग असलेल्या डावखुरा फिरकी गोलंदाज तन्मय बलौदाने ऐतिहासिक कामगिरीची नोंद केली.
Tanmay Balouda 14 Wickets World Record in IND U19 vs AUS U19 2nd Youth Test : ऑस्ट्रेलियाच्या १९ वर्षांखालील (U19) संघाचा भारत दौरा अत्यंत निराशाजनक ठरला. वनडेनंतर युथ कसोटी मालिकेतही भारताने कांगारूंचा धुव्वा उडाला. अहमदाबादच्या नरेंद्र मोदी स्टेडियमवर ५ ऑक्टोबरपासून खेळल्या गेलेल्या दुसऱ्या युथ कसोटी सामन्यात भारतीय युवा संघाने ऑस्ट्रेलियाचा अवघ्या तीन दिवसांत १० गडी राखून धुव्वा उडवला. भारताच्या या दिमाखदार विजयाचा नायक ठरला तो १८ वर्षीय डावखुरा फिरकीपटू तन्मय बालौदा (Tanmay Balouda), ज्याने सामन्यात तब्बल १४ विकेट्स घेत १९ वर्षे जुना जागतिक विक्रम मोडला.
७३ धावांत १४ विकेट्स घेत रचला नवा इतिहास!
तन्मय बालौदाने सामन्याच्या दोन्ही डावांत कांगारूंच्या फलंदाजांना फिरकीच्या तालावर नाचवले. पहिल्या डावात ३२ धावांत ६ विकेट्स आणि दुसऱ्या डावात अवघ्या ४१ धावांत ८ विकेट्स टिपत त्याने सामन्यात ७३ धावांत एकूण १४ विकेट्स खिशात घातल्या. यासह एका युथ कसोटीत सर्वाधिक विकेट्स घेण्याचा २००७ मधील न्यूझीलंडच्या टिम साऊदीचा (१२ विकेट्स) १९ वर्षे जुना वर्ल्ड रेकॉर्ड तन्मयने उद्ध्वस्त केला.
एका युथ कसोटी सामन्यात सर्वाधिक विकेट्स घेणारे गोलंदाज:
Tanmay Baloda recorded the best-ever match figures in a Youth Test as India U-19 registered a dominant 10-wicket win over Australia U-19 at the Narendra Modi Stadium in Ahmedabad.
India U-19 bowled out Australia U-19 for 151, with Baloda returning remarkable figures of 8/41 to finish with a match haul of 14/73.
#TanmayBaloda #YouthTest #India
— CricTracker (@Cricketracker) October 7, 2026
- तन्मय बालौदा (भारत): १४ विकेट्स (विरुद्ध ऑस्ट्रेलिया U19, २०२६)
- टिम साऊदी (न्यूझीलंड): १२ विकेट्स (विरुद्ध भारत U19, २००७)
- फजल-ए-अकबर (पाकिस्तान): १२ विकेट्स (विरुद्ध दक्षिण आफ्रिका U19, १९९७)
- विद्युत शिवरामकृष्णन (भारत): १२ विकेट्स (विरुद्ध इंग्लंड U19, २००१)
- आशिष झैदी (भारत): १२ विकेट्स (विरुद्ध पाकिस्तान U19, १९९७)
अवघ्या ५ चेंडूंत सामना खल्लास; भारताचा मालिकेत २-० ने विजय!
पहिला सामना एक डाव आणि ४८ धावांनी जिंकणाऱ्या भारतीय संघाला दुसऱ्या सामन्यात विजयासाठी केवळ ११ धावांचे लक्ष्य मिळाले होते. सलामीवीर लक्ष्य आणि सागर या जोडीने अवघ्या ५ चेंडूंत हे लक्ष्य गाठून भारताला १० विकेट्सने सहज विजय मिळवून दिला आणि मालिका २-० अशी निर्विवादपणे जिंकली.
