Illegal Parking – महापालिकेने लाखो-कोट्यवधी रुपये खर्च करून नागरिकांच्या सुविधेसाठी रस्ते विकसित करायचे आणि खाजगी शिक्षण संस्थांनी त्यावर आपली खाजगी मालमत्ता असल्यासारखा ताबा मिळवायचा, असा संतापजनक प्रकार चिंचवड गावात उघडकीस आला आहे. चिंचवड गावातील नदीकिनारी असलेल्या तानाजी नगर परिसरात महापालिकेने १८ मीटर रुंद रस्त्याचा दिमाखात विकास केला. मात्र, सध्या या रस्त्याची ओळख ‘पोदार इंटरनॅशनल स्कूल’चे अनधिकृत बस पार्किंग स्थळ म्हणून होऊ लागली आहे.

या १८ मीटर रुंद रस्त्याच्या दोन्ही बाजूंना पोदार शाळेच्या पिवळ्या रंगाच्या अवजड बसची लांबच लांब रांग उभी करून रस्ता पूर्णपणे गिळंकृत करण्यात आला आहे. यामुळे प्रशस्त असलेला रस्ता एखाद्या अरुंद गल्लीसारखा भासू लागला आहे. ​सकाळच्या वेळी तानाजी नगर आणि परिसरातील शेकडो नागरिक, ज्येष्ठ नागरिक आणि महिला येथे मॉर्निंग वॉकसाठी आणि शुद्ध हवेसाठी येतात. मात्र, रस्त्यावर अस्ताव्यस्त पार्क केलेल्या या बसमुळे नागरिकांना धड पायी चालणेही मुश्किल झाले आहे.

रस्त्यावरून चालताना अपघाताचा मोठा धोका निर्माण झाला असून, पादचाऱ्यांच्या हक्काच्या जागेवर या बसेसनी दरोडा टाकला आहे. “शाळेने स्वतःच्या बसेस पार्क करण्यासाठी स्वतःची जागा का वापरू नये?” असा संतप्त सवाल येथील नागरिक विचारत आहेत. महापालिकेच्या मालमत्तेवर अशा प्रकारे खाजगी स्कूल बस उभ्या राहत असताना वाहतूक पोलीस आणि पालिका प्रशासन झोपा काढत आहे का? असाही सवाल उपस्थित केला जात आहे.

​परिसरातील नागरिकांनी आता या विरोधात तीव्र संताप व्यक्त केला असून, “वाहतूक पोलिसांनी या बसेसवर तातडीने आणि कडक दंडात्मक कारवाई करावी, अन्यथा तीव्र आंदोलन छेडले जाईल,” असा इशारा दिला आहे. आता तरी वाहतूक पोलीस या ‘शाळा प्रशासनाच्या’ मनमानीला चाप लावणार का, याकडे सर्वांचे लक्ष लागले आहे.