पिंपरी – पिंपरी-चिंचवड महापालिकेच्या नवीन प्रशासकीय इमारतीचे बांधकाम सुरू आहे. परंतु या कामावरील कामगारांच्या सुरक्षेकडे दुर्लक्ष होत असल्याचे समोर आले आहे. उंचावर सुरू असलेल्या बांधकामाच्या ठिकाणी काही कामगार कोणतेही आवश्यक सुरक्षा साहित्य न वापरता काम करत असल्याचा धक्कादायक प्रकार समोर आला आहे.

त्याबाबत दैनिक प्रभातमध्ये कोट्यवधीच्या मजल्यावर कर्मचाऱ्यांची सुरक्षा वाऱ्यावर अशा मथळ्याखाली ५ सप्टेंबरला बातमी छापून आली. त्यानंतर जाग आलेल्या स्थापत्य विभागाने संबंधित ठेकेदाराला नोटीस देत खुलासा करण्यास सांगितले आहे.

नवीन प्रशासकीय इमारतीच्या बांधकामासाठी मोठ्या प्रमाणावर कामगार कार्यरत आहेत. मात्र, उंच मजल्यावर काम करणाऱ्या कर्मचाऱ्यांकडे सेफ्टी हार्नेस, हेल्मेट, सेफ्टी बेल्ट अथवा इतर आवश्यक वैयक्तिक सुरक्षा साधने नसल्याचे दिसत आहे. बांधकामाच्या ठिकाणी थोडीशी चूक किंवा तोल गेल्यास जीवघेणा अपघात होण्याची शक्यता नाकारता येत नाही.

मात्र, याकडे संबंधित ठेकेदाराने दुर्लक्ष केले आहे. ठेकेदाराच्या करारातील सुरक्षा अटींचे उल्घंन होत असल्याचे समोर आले आहे. हा प्रकार समोर आल्यानंतर के. एम. व्ही प्रोजेक्टस लिमिटेड या ठेकेदार कंपनीला सोमवारी कारणे दाखवा नोटीस देत खुलासा करण्यास सांगितले आहे. विशेष म्हणजे या कामामध्ये ही कंपनी नावाला असून प्रत्यक्ष साइटवर सब ठेकेदार असलेली एक कंपनी काम करत असल्याची माहिती आहे.

कारवाई होणार का?
अलिकडेच महापालिकेच्या प्रकल्प आणि इमारतींमध्ये अपघात घडले आहेत. मोशी येथील वेस्ट टू एनर्जी प्रकल्पाच्या ठिकाणी कचऱ्याचा डोंगर प्रशासकीय इमारतीवर कोसळून नऊ कर्मचाऱ्यांचा जीव गेला. तर स्वातंत्र्य दिनानिमित्त केलेली विद्युत रोषणाई काढत असताना ह क्षेत्रीय कार्यालयावरून तोल जाऊन एका ठेकेदाराच्या कर्मचाऱ्याचा मृत्यू झाला.

असे गंभीर अपघात घडत असतानाही नवीन इमारतीच्या बांधकाम ठिकाणी गंभीर दुर्लक्ष केले जात आहे. कर्मचाऱ्यांना कोणतीही सुरक्षा साधने नसताना कर्मचारी काम करत असल्याने त्यांच्या सुरक्षेचा गंभीर मुद्दा उपस्थित झाला आहे. असे असताना संबंधित ठेकेदारावर महापालिका प्रशासन काय कारवाई करणार? याकडे लक्ष लागले आहे.

Karad: स्पर्धा परीक्षा पेपरफुटीविरोधात विद्यार्थ्यांचा आक्रोश कराडला मोर्चा; जोरदार घोषणाबाजी, सीबीआय चौकशीची मागणी