पुणे : कुख्यात गुंड निलेश घायवळ याला पुण्यातील प्रथमवर्ग न्यायदंडाधिकारी न्यायालयाने फरार घोषित केले आहे. बनावट कागदपत्रे वापरून पासपोर्ट मिळवत लंडनला पळून गेलेल्या घायवळवर दाखल असलेल्या तीन गुन्ह्यांच्या चार्जशीटमध्ये पोलिसांनी त्याला फरारी घोषित केले आहे. आता ३० दिवसांत तो स्वतः न्यायालयात हजर झाला नाही तर त्याची सर्व मालमत्ता जप्त करण्यात येईल, असा स्पष्ट इशारा पोलिसांनी दिला आहे. न्यायाधीश के. पी. जैन यांच्या न्यायालयात सादर करण्यात आलेल्या चार्जशीटमध्ये घायवळच्या फरारी स्थितीचा उल्लेख असून, या निर्णयामुळे त्याच्या बेकायदेशीर मालमत्तेवर पोलिसांची कधीही कारवाई होऊ शकते, असे पोलिस उपायुक्त संभाजी कदम यांनी सांगितले. घायवळवर एकूण १२ हून अधिक गुन्हे दाखल असून, त्यात खंडणी उकळणे, गोळीबार, कोयता हल्ला आणि मकोका कायद्यांतर्गत कारवाईचा समावेश आहे. कोथरूड भागात त्याच्या टोळीने दहशत निर्माण करून जमीन खरेदी-विक्रीचे बेकायदेशीर व्यवहार केल्याचा संशयही पोलिसांनी व्यक्त केला आहे. यापूर्वीच पोलिसांनी घायवळची १० बँक खाती गोठवली असून, त्यात सुमारे ३ कोटी रुपयांचा व्यवहार सील करण्यात आला आहे. तसेच, त्याच्या मालकीच्या तीन गाड्या जप्त करण्यात आल्या आहेत. घरातून काडतुसे, पुंगळ्या, ६० हजार रोख रक्कम, १० तोळे सोने आणि पुणे, मुळशी, जामखेड, धाराशिव जिल्ह्यातील जमिनींच्या खरेदीखती जप्त झाल्या आहेत. घायवळने आडनावात फेरफार करून (घायवळ ऐवजी गायवळ) पासपोर्ट मिळवल्याचा संशय असून, त्याच्या कुटुंबीयांच्या आणि नातेवाईकांच्या मालमत्तेवरही सील करण्याची प्रक्रिया सुरू आहे. या कारवाईमुळे घायवळच्या गुन्हेगारी कारवायांना आर्थिक धक्का बसणार असल्याचे पोलिसांचे म्हणणे आहे. घायवळ टोळीशी अमली पदार्थांच्या व्यापाराचा संबंध असल्याची चौकशीत धक्कादायक माहिती समोर आली असून, पोलिसांनी त्याच्या फरार सदस्यांचा शोध घेण्यासाठी विशेष मोहीम सुरू केली आहे. घायवळला पकडण्यासाठी ‘लूक आऊट’ नोटीस जारी करण्यात आली असून, परदेशी पोलिसांशी समन्वय साधला जात आहे.
