Prajakta Tanpure : राष्ट्रवादी काँग्रेस (शरदचंद्र पवार गट) पक्षाचे नेते आणि माजी मंत्री प्राजक्त तनपुरे यांनी अखेर भाजपमध्ये प्रवेश करण्याचा निर्णय घेतला आहे. आज दुपारी 3 वाजता भाजप प्रदेशाध्यक्ष रविंद्र चव्हाण (Ravindra Chavan) यांच्या उपस्थितीत त्यांचा पक्षप्रवेश होणार आहे. मात्र या निर्णयापूर्वी तनपुरे यांनी व्यक्त केलेल्या भावना राजकीय वर्तुळात चर्चेचा विषय ठरत आहेत.

“मी आज भाजपमध्ये प्रवेश करतोय. माझे मामा जयंत पाटील यांना भेटण्याची हिंमत माझ्यात नाही. त्यांना याबाबत सांगितलेही नाही. तसेच शरद पवार यांनाही भेटण्याची हिंमत होत नाही. पण मतदारसंघातील अडचणी, कार्यकर्त्यांच्या भावना आणि त्यांच्या भवितव्याचा विचार करून हा निर्णय घेत आहे,” असे भावनिक वक्तव्य प्राजक्त तनपुरे यांनी भाजपमध्ये प्रवेश करण्यापूर्वी केले.

खरंतर गेल्या अनेक दिवसांपासून प्राजक्त तनपुरे हे भाजपात प्रवेश करणार असल्याच्या चर्चा राजकीय वर्तुळात रंगल्या होत्या. अखेर ते आपल्या हाती कमळ घेणार आहेत. नुकतीच त्यांनी खासदार सुप्रिया सुळे यांची भेट घेतली होती. या भेटीमुळे त्यांच्या भाजप प्रवेशाला ब्रेक लागणार असल्याची चर्चा सुरू होती. मात्र, तसे काही झाले नाही. सुळे यांच्यासोबत तनपुरे यांची काय चर्चा झाली याबाबत देखील माहिती समोर आली आहे.  (Prajakta Tanpure)

 

खासदार सुप्रिया सुळे यांची मुंबईतील वाय. बी. चव्हाण सेंटरमध्ये प्राजक्त तनपुरे यांनी भेट घेतली. जवळपास दहा मिनिटे झालेल्या चर्चेत त्यांनी भाजपमध्ये जाण्याचा निर्णय कळवला. तसेच पक्षाने आतापर्यंत दिलेल्या संधींसाठी सुप्रिया सुळे यांचे आभारही मानले. यावेळी तनपुरे यांनी आपल्या राजकीय प्रवासाची आठवण करून दिली.

हेही वाचा :  Hair Fall: अॅसिडिटीमुळे वाढते का केस गळती? जाणून घ्या तज्ज्ञांचे मत

“अजित पवार भाजपसोबत जाणार असल्याची चर्चा सुरू असताना अनेक आमदारांनी समर्थन पत्रावर स्वाक्षऱ्या केल्या होत्या. मात्र मी स्वाक्षरी न करता बैठकीतून बाहेर पडलो होतो. मी कायम पक्षनिष्ठ राहिलो आणि सत्तेविरोधात संघर्ष केला,” असे त्यांनी सांगितले. आजही हा निर्णय वैयक्तिक फायद्यासाठी नाही. माझ्यासोबत संघर्ष करणाऱ्या कार्यकर्त्यांच्या भावना आणि त्यांच्या राजकीय भविष्याचा विचार करूनच हा निर्णय घेतला आहे,” असे तनपुरे यांनी स्पष्ट केले आहे.  (Prajakta Tanpure)

प्राजक्त तनपुरे यांच्या भाजप प्रवेशामुळे शरद पवार गटाला मोठा धक्का बसला आहे. महाविकास आघाडी सरकारमध्ये प्राजक्त तनपुरे हे मंत्री होते. त्यांनी विविध जबाबदाऱ्या सांभाळल्या आहेत. आघाडी सरकार गेल्यानंतर आणि अजित पवार यांनी भाजपसोबत हातमिळवणी केल्यानंतर प्राजक्त तनपुरे यांनी शरद पवारांना साथ दिली होती.

हेही वाचा : Netflix Movies: नेटफ्लिक्सवरील ‘या’ ७ हॉरर चित्रपटांनी उडवली प्रेक्षकांची झोप; पाहताना अंगावर येईल काटा!