Hinjawadi Police – अवैध गावठी दारू विक्री आणि वाहतुकीविरोधात हिंजवडी पोलिसांनी कठोर भूमिका घेत कारवाईचा धडाका लावला आहे. गेल्या दहा महिन्यांत पोलिसांनी विविध गुन्ह्यांतील २८ आरोपींना जिल्ह्यातून तडीपार केले असून दोघांना महाराष्ट्र प्रतिबंधक धोकादायक क्रियाकलाप कायद्यान्वये (एमपीडीए) स्थानबद्ध केले आहे. तसेच २५ आरोपींवर मोक्का अंतर्गत कारवाई करण्यात आली आहे.

फुगेवाडी येथील विषारी दारू प्रकरणानंतर जिल्हाभर अवैध दारू विक्रीविरोधात मोहीम सुरू असताना हिंजवडी पोलिसांनी अवैध गावठी दारू विक्रेत्यांवर विशेष लक्ष केंद्रित केले आहे. महाराष्ट्र दारूबंदी कायद्यांतर्गत कारवाई करत अकलेशकुमार जितमल नट याला कोल्हापूर येथील कळंबा कारागृहात, तर दुसऱ्या एका आरोपीला नाशिक मध्यवर्ती कारागृहात एक वर्षासाठी स्थानबद्ध करण्यात आले आहे.

याशिवाय कांतीलाल मिठूलाल नट (माण) आणि मनीष दिलीप चव्हाण (मारुंजी) यांच्यासह अवैध गावठी दारू विक्री करणाऱ्या अन्य आरोपींना जिल्ह्यातून हद्दपार करण्यात आले आहे. एमडीपीएस कायद्यांतर्गत गांजा विक्री करणाऱ्या आरोपींवरही कारवाई करण्यात आली असून विविध गुन्ह्यांतील एकूण २८ जणांना तडीपार करण्यात आले आहे.

वरिष्ठ पोलीस निरीक्षक बालाजी पांढरे यांनी पदभार स्वीकारल्यानंतर गुन्हेगारीविरोधातील मोहिमेला अधिक गती मिळाली आहे. त्यांच्या नेतृत्वाखाली पोलिसांनी पाच वेगवेगळ्या गुन्ह्यांतील २५ आरोपींवर महाराष्ट्र संघटित गुन्हेगारी नियंत्रण कायदा (मोक्का) अंतर्गत कारवाई केली आहे. अवैध दारू, गांजा आणि अफू विक्रेत्यांविरोधातील कठोर कारवाईमुळे गुन्हेगारांमध्ये भीतीचे वातावरण निर्माण झाले असून अनेकांनी अवैध धंदे बंद केल्याची चर्चा परिसरात सुरू आहे.

“अवैध दारू विक्रीच्या गुन्ह्यांमध्ये वारंवार सहभागी होणाऱ्या आरोपींना आम्ही कठोरात कठोर शिक्षा म्हणून थेट हद्दपार करण्याची प्रक्रिया केली असून वरिष्ठांच्या मार्गदर्शनानुसार गुन्हेगारीला आळा घालण्यासाठी आम्ही कुणाचीही गय करत नाही. अनेकदा खटले भरून ही छुप्या पद्धतीने व्यवसाय करणाऱ्यांवर कोणतीही दया दाखविली जाणार नसून, अशा अवैध धंद्या विरोधातील कारवाया आम्ही आणखी तीव्र केल्या आहेत.”
– बालाजी पांढरे, वरिष्ठ पोलीस निरीक्षक हिंजवडी पोलीस ठाणे