Haryana school : शाळकरी मुलांचा खेळादरम्यान किंवा इतर कारणांमुळे पारंपारिक गाठ मारलेल्या टायमुळे गळा आवळून मृत्यू होण्याच्या घटना समोर आल्या आहेत. या गंभीर बाबीची दखल घेत, हरियाणा राज्य बालहक्क संरक्षण आयोगाने राज्यातील सर्व शाळांना शालेय गणवेशातून पारंपरिक टायची सक्ती तात्काळ बंद करण्याचे आदेश दिले आहेत.

आयोगाच्या अध्यक्षा तृप्ती शेओरान यांनी १० जुलै रोजी ही मार्गदर्शक तत्त्वे जारी केली. नुकतीच हरियाणाच्या भिवानी जिल्ह्यात एका ७ वर्षांच्या मुलाचा आपल्या मोठ्या भावाच्या टायसोबत खेळताना अपघाती गळफास लागून मृत्यू झाल्याची दुर्दैवी घटना घडली होती.

केवळ शिस्त आणि दिसण्यासाठी मुलांच्या जीवाशी खेळणे अयोग्य आहे. त्यामुळे पारंपरिक टायऐवजी क्लिप-ऑन किंवा वेल्क्रोवाले टाय वापरावेत, जे आणीबाणीच्या प्रसंगी किंवा ओढले गेल्यास लगेच गळ्यातून वेगळे होतात.

जोपर्यंत शाळा नवीन पर्याय स्वीकारत नाहीत, तोपर्यंत क्रीडा स्पर्धा, शारीरिक शिक्षण आणि मैदानी खेळांच्या तासादरम्यान मुलांनी टाय घालू नये याची काळजी शाळांनी घ्यावी. टायमुळे होऊ शकणाऱ्या संभाव्य धोक्यांबाबत शिक्षक, विद्यार्थी आणि पालकांमध्ये जागृती निर्माण करावी अशा सूचना आयोगाकडून करण्यात आल्या आहेत.

नॅशनल इंडिपेंडंट स्कूल्स अलायन्सच्या हरियाणा शाखेचे अध्यक्ष कुलभूषण शर्मा यांनी या निर्णयाचे स्वागत केले आहे. ही संघटना राज्यातील सुमारे ६,००० खासगी शाळांचे प्रतिनिधित्व करते. मुलांची सुरक्षा आमच्यासाठी सर्वोच्च आहे. जर एखाद्या कपड्यामुळे किंवा वस्तूमुळे मुलांच्या सुरक्षेला थोडा जरी धोका निर्माण होत असेल, तर तो बदललाच पाहिजे.

सरकारकडून येणाऱ्या सर्व सूचनांचे आम्ही पालन करू, असे शर्मा यांनी सांगितले. हरियाणाच्या शालेय शिक्षण विभागाला हा आदेश राज्यातील सर्व शासकीय, अनुदानित आणि खासगी शाळांमध्ये तात्काळ लागू करण्याचे निर्देश देण्यात आले आहेत.