इंदापूर : कर्मयोगी शंकररावजी पाटील सहकारी साखर कारखान्याची पंचवार्षिक निवडणूक अखेर बिनविरोध झाली आहे. कारखान्याच्या आर्थिक अडचणी, सहकार क्षेत्रापुढील आव्हाने आणि राजकीय समीकरणांची चर्चा सुरू असतानाही राज्याचे माजी मंत्री व कारखान्याचे चेअरमन हर्षवर्धन पाटील यांनी ऊस उत्पादक सभासदांना विश्वासात घेत निवडणूक बिनविरोध करण्यासाठी पुढाकार घेतला. पुणे जिल्हा मध्यवर्ती सहकारी बँकेचे संचालक आप्पासाहेब जगदाळे यांच्या सहकार्यामुळे या प्रक्रियेला महत्त्वपूर्ण दिशा मिळाल्याचे मानले जात आहे.

कर्मयोगी कारखान्याची निवडणूक लागणार की पुन्हा बिनविरोध होणार, याकडे केवळ इंदापूर तालुक्याचेच नव्हे, तर संपूर्ण पुणे जिल्ह्याचे लक्ष लागले होते. निवडणुकीच्या पार्श्वभूमीवर विविध राजकीय चर्चांना उधाण आले होते. मात्र, उमेदवारी अर्ज मागे घेण्याच्या अंतिम मुदतीनंतर निवडणूक निर्णय अधिकारी डॉ. यशवंत माने यांनी माघार घेतलेल्या उमेदवारांची यादी जाहीर केली आणि निवडणूक बिनविरोध होण्याचा मार्ग स्पष्ट झाला. विशेष म्हणजे, मागील पंचवार्षिक निवडणूकदेखील बिनविरोध झाली होती. आता सलग दुसऱ्यांदा कारखान्याची निवडणूक बिनविरोध झाली आहे.

कारखान्याच्या निवडणुकीत एकूण ४० उमेदवारी अर्ज वैध ठरले होते. त्यापैकी १९ उमेदवारांनी माघार घेतल्याने २१ जागांसाठी २१ उमेदवारांचा मार्ग मोकळा झाला. इंदापूर, कालठण, पळसदेव आणि भिगवण या ऊस उत्पादक गटांसह महिला राखीव, इतर मागास प्रवर्ग, भटक्या विमुक्त जाती-जमाती आणि ब वर्ग सहकारी संस्था प्रतिनिधी अशा सर्व प्रवर्गांतील निवडणूक प्रक्रिया बिनविरोध होण्याच्या दिशेने पूर्ण झाली. या निवडणुकीतील विशेष लक्षवेधी बाब म्हणजे अत्यंत सामान्य आणि आर्थिकदृष्ट्या दुर्बल कुटुंबातील ऊस उत्पादक शेतकऱ्यांनाही संचालक मंडळात प्रतिनिधित्वाची संधी मिळत आहे.

विधानसभेतील पराभव, पण सहकारातील नेतृत्व कायम

इंदापूरच्या राजकारणात हर्षवर्धन पाटील यांना विधानसभा निवडणुकीत पराभवाला सामोरे जावे लागले असले, तरी सहकारी साखर कारखान्यांच्या माध्यमातून त्यांनी आपले नेतृत्व कायम ठेवले आहे. राजकीय सत्तेची समीकरणे बदलली, निवडणुकीतील विजय-पराजयाचे चित्र बदलले, तरी सहकारातील संस्थात्मक नेतृत्व टिकवून ठेवण्याचा त्यांचा प्रयत्न या बिनविरोध निवडणुकीच्या निमित्ताने पुन्हा चर्चेत आला आहे. विशेष म्हणजे, कर्मयोगी कारखान्याबरोबरच नीरा-भीमा सहकारी साखर कारखान्याची निवडणूकही यापूर्वी त्यांच्या नेतृत्वाखाली बिनविरोध झाली होती. त्यामुळे सहकार क्षेत्रातील दोन्ही संस्थांमधील त्यांचे नेतृत्व हा इंदापूरच्या राजकारणातील स्वतंत्र चर्चेचा विषय बनला आहे.

बिनविरोध झालेले संचालक मंडळ

१. सर्व साधारण गट क्र. १ इंदापूर
१. ॲड. राकेश रमेशप्रसाद शुक्ल
२. रविंद्र वामन सरडे
३. शांतीलाल दत्तात्रय शिंदे

२. सर्व साधारण गट क्र. २ कालठण
१. छगन धोंडीबा भोंगळे
२. निलेश शामराव देवकर
३. हर्षवर्धन शहाजीराव पाटील

३. सर्व साधारण गट क्र. ३ पळसदेव
१. राजेंद्रकुमार प्रतापराव देवकर
२. संतोष लक्ष्मण काळे
३. श्रीकांत खिवराव देवकर

४. सर्व साधारण गट क्र. ४ भिगवण
१. विजय विठ्ठल खर्चे
२. पराग रमेशराव जाधव
३. रणजित नामदेव निकम

५. सर्व साधारण गट क्र. ५ शेळगांव
१. रोहित राजेंद्र गायकवाड
२. बिभिषण कल्याण नलवडे
३. अतुल शिवाजी शिंगाडे

६. इतर मागास प्रवर्ग
१. वसंत खंडू मोहोळकर

७. भटक्या विमुक्त जाती व जमाती
१. हरिश्चंद्र सदाशिव पारेकर

८. महिला राखीव प्रतिनिधी
१. रत्नमाला संपत पवार
२. सुमन नारायण व्यवहारे

९. अनुसूचित जाती / जमाती
१. अमोल सुभाष जाधव

१०. ब वर्ग
१. राजवर्धन हर्षवर्धन पाटील