पुणे :  येरवडा मध्यवर्ती कारागृहाच्या संरक्षण भिंतीलगत फटाके फोडून कारागृहातील एका आरोपीचा वाढदिवस साजरा करत त्याचे सोशल मीडियावर उदात्तीकरण करणाऱ्या एका तरुणाला येरवडा पोलिसांनी अटक केली आहे. सोशल मीडियाद्वारे गुन्हेगारीचे गौरवीकरण करणाऱ्यांविरोधात कठोर कारवाईचा इशारा पोलिसांनी दिला आहे.

येरवडा पोलीस ठाण्याच्या हद्दीत कारागृह परिसरात विशेष गस्त घालण्याच्या सूचना वरिष्ठ अधिकाऱ्यांनी दिल्या होत्या. त्यानुसार पोलीस उपनिरीक्षक किशोर बेरड आणि तपास पथक मंगळवारी (४ ऑगस्ट) पेट्रोलिंग करत असताना, येरवडा पोलीस ठाण्यात दाखल गुन्ह्यातील फरार आरोपी शंकर बाळासाहेब भालके (वय १९, रा. धनकवडी) हा पोस्ट ऑफिस चौक परिसरात येणार असल्याची गोपनीय माहिती मिळाली. त्यानुसार सापळा रचून त्याला ताब्यात घेण्यात आले.

वाहतुकीस अडथळा निर्माण करत फटाके फोडल्याची कबुली   (Pune Crime News)

चौकशीदरम्यान भालके याने, कारागृहात असलेल्या सुलतान सय्यद याच्या वाढदिवसानिमित्त त्याच्या मित्रांनी येरवडा मध्यवर्ती कारागृहाच्या संरक्षण भिंतीशेजारी वाहतुकीस अडथळा निर्माण करत मोठ्या प्रमाणात फटाके फोडल्याची कबुली दिली. या घटनेचे व्हिडिओ चित्रीकरण करून ते इन्स्टाग्रामवर प्रसारित करण्यात आले. त्यामुळे आरोपीचे गुन्हेगारी स्वरूपाचे उदात्तीकरण झाल्याचे पोलिसांच्या तपासात निष्पन्न झाले.

इतर सहभागींचा शोध सुरू  ( Pune Crime News)

येरवडा पोलिसांनी संबंधित आरोपीला अटक केली असून या प्रकरणातील इतर सहभागींचा शोध सुरू आहे. सोशल मीडियाचा वापर करून गुन्हेगारांचे गौरवीकरण करणारे व्हिडिओ तयार करणे, प्रसारित करणे किंवा अशा कृत्यांना प्रोत्साहन देणाऱ्यांवर यापुढे कठोर कायदेशीर कारवाई करण्यात येईल, असा इशारा पोलिसांनी दिला आहे.

ही कारवाई पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त मनोज पाटील, पोलीस उपायुक्त रजनिकांत चिलुमुला, सहाय्यक पोलीस आयुक्त सुनील जैतापूरकर, वरिष्ठ पोलीस निरीक्षक उमेश गित्ते आणि पोलीस निरीक्षक (गुन्हे) केशव दिंडे यांच्या मार्गदर्शनाखाली पोलीस उपनिरीक्षक किशोर बेरड व त्यांच्या तपास पथकाने केली.

हेही वाचा: 

World Breastfeeding Week: स्तनपान करणाऱ्या मातांसाठी ‘हे’ सुपरफूड्स ठरू शकतात फायदेशीर; दूध वाढवण्यासाठी जाणून घ्या तज्ज्ञांचा सल्ला