Gandhi Jayanti Pune- महात्मा गांधी जयंती आणि जागतिक अहिंसा दिनानिमित्त महाराष्ट्र गांधी स्मारक निधी आणि युवक क्रांती दल महाराष्ट्र यांच्या वतीने गुरुवारी डेक्कन येथील मक्केशाह मस्जिद आणि पांचाळेश्वर मंदिर ते कोथरूड येथील गांधी भवनदरम्यान शांती मार्च काढण्यात आला. शांती मार्चच्या प्रारंभी ‘शिवराय ढोल-ताशा पथका’च्या वादकांनी छत्रपती शिवाजी महाराजांचा जयघोष करीत ढोल-ताशांच्या गजरात मानवंदना दिली.

‘हम सब एक हैं’, ‘महात्मा गांधी अमर रहे’, ‘गांधींचा विचार, राष्ट्रीय एकात्मतेचा विचार’ अशा घोषणांतून विद्यार्थ्यांनी शांतता, अहिंसा आणि सामाजिक सलोख्याचा संदेश दिला. गांधीभवन येथील कार्यक्रमात महाराष्ट्र गांधी स्मारक निधीचे अध्यक्ष डॉ. शिवाजीराव कदम, विश्वस्त सचिव अन्वर राजन, सीए एम. एस. जाधव, प्रवीण सप्तर्षी, रमेश आढाव आदी उपस्थित होते.

गांधीजी अजरामर असून, त्यांचे विचार पुढे नेणे आवश्यक आहे. सर्वसामान्य माणूस ते राष्ट्रपिता हा त्यांचा प्रवास समजून घेणे गरजेचे आहे, असे डाॅ. कदम म्हणाले. अन्य मान्यवरांची भाषणे झाली. सूत्रसंचालन अभय देशपांडे आणि सूरज कुलकर्णी यांनी केले.

पुण्यात १७ किलोमीटर सत्याग्रह मार्च!
म. गांधी जयंतीनिमित्त पुणे ॲनिमल लिबरेशनच्या वतीने प्राणी हक्क, अहिंसा आणि पर्यावरण संवर्धनाचा संदेश देण्यासाठी १७ किमीच्या सत्याग्रह पदयात्रेचे आयोजन करण्यात आले. या पदयात्रेत १२० हून अधिक तरुण, नागरिक आणि प्राणिप्रेमींनी सहभाग घेतला. कोथरूड येथील गांधी भवन येथून सुरू झालेली ही पदयात्रा कर्वे पुतळा, ते आगाखान पॅलेसपर्यंत काढण्यात आली.

पदयात्रेदरम्यान जिल्हाधिकारी कार्यालय आणि महानगरपालिका प्रशासनाकडे विविध मागण्यांची निवेदने देण्यात आली. आगाखान पॅलेस येथे कस्तुरबा गांधी, महादेव देसाई आणि महात्मा गांधी यांच्या समाधीस्थळी पुष्पहार अर्पण करून पदयात्रेची सांगता झाली.