Gyanesh Kumar Resignation – मतदारयाद्या पडताळणीच्या (एसआयआर) मुद्द्यावर संसदेतील चर्चेला सामोरे जाण्याचे आव्हान केंद्रीय गृहमंत्री अमित शहा यांनी विरोधकांना दिले. त्यावरून कॉंग्रेसने प्रतिआव्हान दिले.

संसदेत चर्चा घेण्याविषयी शहा खरोखरीच गंभीर असतील; तर त्यांनी प्रथम मुख्य निवडणूक आयुक्त ज्ञानेश कुमार यांच्या राजीनाम्याची निश्‍चिती करावी. तसेच, एसआयआरची प्रक्रिया थांबवावी, असे त्या पक्षाने म्हटले.

विरोधी पक्षांच्या इंडिया आघाडीने कथित मतचोरी विरोधात जोरदार रणशिंग फुंकले आहे. त्यावरून शहा यांनी विरोधकांवर निशाणा साधला.

एसआयआरवर चर्चा करण्यासाठी केंद्र सरकारची संसदेचे विशेष अधिवेशन बोलावण्याची तयारी आहे. विरोधकांनी चर्चेसाठी यावे. मात्र, त्यांना चर्चेत रस नाही. विरोधक संसदेचे कामकाज चालू देत नाहीत, असा आरोप त्यांनी केला.

त्यावर कॉंग्रेसचे ज्येष्ठ नेते जयराम रमेश यांनी प्रतिक्रिया दिली. स्वत:ला चाणक्य समजणारे शहा मतचोरीवर चर्चा करण्यासाठी विशेष अधिवेशन बोलावण्यास तयार असल्याचे म्हणत आहेत.

याआधीच विरोधकांनी एसआयआरवर चर्चेची मागणी केली. त्यावेळी एसआयआर हा निवडणूक आयोगाच्या अधिकार क्षेत्रातील विषय असल्याचे म्हणत शहांनी नकार दर्शवला, याची आठवण त्यांनी करून दिली.