Farokh Engineer Stand Naming : बुधवारी, मँचेस्टरच्या ओल्ड ट्रॅफर्ड मैदानावरील एका स्टँडचे नामकरण माजी यष्टीरक्षक फारुख इंजिनीअर यांच्या नावावर करण्यात आले. परदेशातील मैदानावर भारतीय खेळाडूच्या सन्मानार्थ अशा प्रकारचा हा पहिलाच प्रसंग आहे. ओल्ड ट्रॅफर्ड येथील खेळाडू आणि माध्यम केंद्र यांच्यामध्ये तसेच हिल्टन हॉटेलच्या विस्ताराजवळ असलेल्या ‘बी स्टँड’चे भारत आणि इंग्लंड यांच्यातील चौथ्या कसोटी सामन्याच्या पहिल्या दिवशी औपचारिकरित्या सर क्लाइव लॉयड आणि फारुख इंजिनीअर स्टँड असे नामकरण करण्यात आले.

संपूर्ण भारतासाठी अभिमानाचा क्षण – 

लँकशायर क्रिकेट क्लबमधील त्यांच्या अतुलनीय योगदानाच्या सन्मानार्थ स्टँडच्या अनावरण समारंभात इंजिनीअर आणि वेस्ट इंडिजचे दिग्गज कर्णधार लॉयड उपस्थित होते. यावेळी इंजिनीअर यांनी पीटीआयला सांगितले, “हा केवळ माझ्यासाठीच नव्हे तर संपूर्ण भारतासाठी अभिमानाचा क्षण आहे. आज सकाळी क्लाइव आणि मी याबद्दल बोलत होतो. आम्हाला कधीच वाटले नव्हते की आमच्या सन्मानार्थ असे काही केले जाईल. ईश्वर महान आहे. माझ्या देशात हा मान न मिळाल्याची कमतरता यामुळे भरून निघाली.”

सन्मान मिळाला नाही, ही लज्जास्पद बाब –

87 वर्षीय इंजिनीअर यांनी आपले बहुतांश क्रिकेट मुंबईतील ब्रेबॉर्न स्टेडियमवर खेळले. ते म्हणाले, “माझ्या कामगिरीचा जिथे मी माझे बहुतांश क्रिकेट खेळलो, तिथे सन्मान मिळाला नाही, ही लज्जास्पद बाब आहे.” तथापि, 2024 मध्ये भारतीय बीसीसीआयने त्यांना ‘लाइफटाइम अचिव्हमेंट’ पुरस्कार देऊन सन्मानित केले होते, याबद्दल इंजिनीअर यांनी कृतज्ञता व्यक्त केली. भारताचे आंतरराष्ट्रीय खेळाडू असलेले इंजिनिअर लंकाशरचे यष्टीरक्षक होते. त्यांनी 1968 ते 1976 या काळात क्लबचे प्रतिनिधित्व केले. त्यांनी क्लबसाठी 175 सामने खेळले, ज्यामध्ये त्यांनी 5,942 धावा केल्या, 429 झेल घेतले आणि 35 यष्टीचीत केले.

हेही वाचा – Rishabh Pant : भारतीय संघाला मोठा धक्का! ऋषभ पंत दुखापतीमुळे तब्बल ‘इतके’ आठवडे मैदानापासून राहणार दूर

लँकशायर क्रिकेट क्लबने एका निवेदनात म्हटले, “लँकशायर क्रिकेट क्लबला हे जाहीर करताना आनंद होत आहे की, क्लबने एमिरेट्स ओल्ड ट्रॅफर्ड येथील एका स्टँडचे नामकरण क्लबचे दिग्गज आणि ‘हॉल ऑफ फेम’ मध्ये समाविष्ट असलेले सर क्लाइव लॉयड आणि फारुख इंजिनीअर यांच्या नावावर केले आहे.” निवेदनात पुढे म्हटले, “हा समारोह आज सकाळी इंग्लंड आणि भारत यांच्यातील चौथ्या कसोटी सामन्याच्या पहिल्या दिवशी पार पडला, ज्यामध्ये सर क्लाइव आणि फारुख यांच्यासह क्लबचे प्रतिनिधी फलकाच्या अनावरणासाठी उपस्थित होते.”