प्रभात वृत्तसेवा
वडापुरी – इंदापूर तालुक्यातील स्थानिक स्वराज्य संस्थांच्या निवडणुकीच्या पार्श्वभूमीवर सर्वच पक्षांनी आपापली मोर्चेबांधणी सुरू केली आहे. सोशल मीडियावरून शुभेच्छांचा पाऊस, नेत्यांना भेटीगाठी, तसेच संघटनांमध्ये हालचालींना वेग आल्याने तालुक्यात राजकीय तापमान वाढले आहे.याच पार्श्वभूमीवर माळवाडी-वडापुरी जिल्हा परिषद गट सर्वसाधारण झाल्यानंतर भारतीय जनता पक्षाकडून पूर्व मंडल अध्यक्ष राम आसबे यांच्या नावाची जोरदार चर्चा सुरु आहे.

गेल्या 12 वर्षांपासून पक्षात विविध पदांवर कार्यरत असलेले राम आसबे यांनी भाजपा युवा मोर्चा अध्यक्ष, तालुका सरचिटणीस, तसेच सध्या भाजपाचे पूर्व मंडल अध्यक्ष म्हणून कार्य केले आहे. त्यांनी यापूर्वी 2017 मध्ये (वडापुरी-काटी) जिल्हा परिषद निवडणूक लढवली होती.दरम्यान, या गटातून भाजपाचे दुसरे पदाधिकारी प्रेमकुमार जगताप हेही इच्छुक असल्याची माहिती समोर आली आहे. त्यामुळे या गटात उमेदवारीसाठी आसबे व जगताप यांच्यात चुरस निर्माण होण्याची शक्यता आहे.

स्थानिक राजकीय वर्तुळात या दोन्ही इच्छुकांच्या हालचालींनी उत्सुकता वाढली असून, पक्ष नेतृत्वाकडून उमेदवार जाहीर झाल्यानंतर या गटातील समीकरणे स्पष्ट होणार आहेत.यावेळी राम आसबे यांनी सांगितले की, भाजपाची निवडणुकीसाठीची तयारी सुरू आहे. पक्षश्रेष्ठी ज्या पद्धतीने निर्णय घेतील, त्यानुसार आम्ही निवडणुकीला सामोरे जाणार आहोत.

इंदापूर तालुक्यात प्रवीण माने यांच्या नेतृत्वाखाली पक्षाची ताकद वाढली असून जिल्हाध्यक्ष शेखर वढणे यांच्या मार्गदर्शनाखाली संघटना अधिक बळकट होत आहे. पक्षाने सूचना केल्यास जिल्हा परिषद किंवा पंचायत समितीसाठी माझी तयारी आहे. पक्ष देईल त्या उमेदवाराचे आम्ही मनापासून काम करू.