Eknath Shinde – उपमुख्यमंत्री एकनाथ शिंदे यांनी गुरुवारी अहिर-तापोळा या महत्त्वाकांक्षी पुलाच्या कामाची पाहणी केल्यानंतर ‘स्मार्ट पीएचसी’ म्हणून विकसित करण्यात आलेल्या तापोळा प्राथमिक आरोग्य केंद्राला भेट देऊन तेथील आरोग्य सुविधांचा सविस्तर आढावा घेतला. आरोग्य केंद्राच्या पाहणीदरम्यान उपमुख्यमंत्री शिंदे यांनी थेट औषध साठवणूक कक्षात जाऊन औषधांच्या बाटल्यांवरील कालबाह्यता तारखा (एक्स्पायरी डेट्स) स्वतः तपासून पाहिल्या.

रुग्णांना दिली जाणारी औषधे सुरक्षित आणि मुदतीत असल्याची खात्री त्यांनी करून घेतली. यासोबतच ग्रामीण भागातून उपचारासाठी येणार्‍या रुग्णांसाठीच्या सोयी-सुविधा, विविध वॉर्डांमधील स्वच्छता आणि स्वच्छतागृहांची व्यवस्था यांचीही त्यांनी बारकाईने पाहणी केली.

तज्ज्ञ डॉक्टरांची नियुक्ती अन् स्वतंत्र डीपीच्या सूचना
आरोग्य केंद्रात पाहणीदरम्यान तज्ज्ञ डॉक्टरांची कमतरता असल्याचे निदर्शनास आले. यावर आरोग्यमंत्र्यांशी तात्काळ चर्चा करून आवश्यक डॉक्टरांची नियुक्ती लवकरच केली जाईल, असे आश्वासन ना. शिंदे यांनी दिले. आरोग्य केंद्रात वारंवार होणार्‍या वीजपुरवठा खंडित होण्याच्या समस्येवर स्थानिक कर्मचारी व अजित सपकाळ यांनी स्वतंत्र डीपी बसविण्याची मागणी केली. या मागणीची तात्काळ दखल घेत उपमुख्यमंत्री शिंदे यांनी पालकमंत्री शंभूराज देसाई यांच्याशी फोनवरून संपर्क साधून आरोग्य केंद्रासाठी स्वतंत्र डीपी बसवण्याचे निर्देश दिले.

अधिकारी व कर्मचार्‍यांशी संवाद
पाहणीनंतर शिंदे यांनी आरोग्य केंद्रातील अधिकारी व कर्मचार्‍यांसोबत बैठक घेऊन त्यांच्या अडचणी समजून घेतल्या आणि त्यावर विविध उपाययोजनांबाबत चर्चा केली. यावेळी जिल्हा परिषद सदस्य अजित सपकाळ, महाबळेश्वर पंचायत समितीचे उपसभापती संजय मोरे, सचिन कदम, सुभाष कारंडे, शिवसागर बोट क्लबचे अध्यक्ष आनंद धनावडे, विशाल सपकाळ, राम सपकाळ, गणेश उतेकर, तुकाराम धनावडे यांच्यासह तापोळा परिसरातील ग्रामस्थ उपस्थित होते.