नवी दिल्ली : देशपातळीवर काही दिवसांपासून घडत असलेल्या घडामोडींमुळे भाजपच्या नेतृत्वाखालील एनडीए अर्थात राष्ट्रीय लोकशाही आघाडीला तडे जातात की काय अशी चर्चा सुरू झाली होती. अशातच भाजपचे राष्ट्रीय अध्यक्ष जे. पी. नड्डा यांच्या निवासस्थानी एनडीएतील प्रमुख नेत्‍यांची बैठक पार पडली. या बैठकीला एनडीएमधील मित्रपक्षांच्या नेत्यांसोबत केंद्रीय गृहमंत्री अमित शहा हेही उपस्थित होते.

एनडीएतील घटक पक्षांमध्ये उत्तम समन्वय राखण्याच्या दृष्टीने यावेळी विचार विनिमय करण्‍यात आल्‍याचे समजते. या बैठकीला भाजपचे राष्ट्रीय अध्यक्ष जे. पी. नड्डा यांच्यासह गृहमंत्री अमित शहा, तेलुगू देसमचे अध्यक्ष चंद्राबाबू नायडू, शिवसेनेचे नेते प्रतापराव जाधव, जेडीयूचे नेते ललन सिंह, जेडीएसचे नेते एच. डी. कुमारस्वामी, निषाद पार्टीचे संजय निषाद, हम पार्टीचे जीतनराम मांझी, अपना दलाच्या अनुप्रिया पटेल यांच्यासह एनडीएचे इतर नेते उपस्थित होते.

बैठकीला उपस्थित राहण्यासाठी एनडीएमधील मित्र पक्ष असलेल्या भारत धर्मजनसेना पक्षाचे नेते तुषार वेल्लापल्ली यांनी देखील हजेरी लावली होती. या बैठकीमध्ये सुरुवातीला हरयाणा, महाराष्ट्र विधानसभा आणि उत्तर प्रदेशमधील पोटनिवडणुकीत एनडीएला मिळालेल्या यशाबद्दल अभिनंदन करण्‍यात आले. त्यानंतर वन नेशन, वन इलेक्शन आणि डॉ. बाबासाहेब आंबेडकर यांच्या अवमानाचा मुद्दा तसेच इतर मुद्यांवर चर्चा करण्‍यात आल्‍याची प्राथमिक माहिती सूत्रांनी दिली.

दरम्‍यान, एनडीएच्या आधीच्या बैठकीमध्ये एनडीएचे सर्व नेते महिन्यातून एकदा बैठक घेतील, असे निश्चित झाले होते. मात्र हरियाणा, महाराष्ट्र आणि झारखंडमधील विधानसभा निवडणुकीच्या व्यस्ततेमुळे ही बैठक होऊ शकली नव्हती.