Digital Arrest – नाशिक सायबर सेलमधील पोलीस अधिकारी असल्याचे भासवून ७२ वर्षीय ज्येष्ठ नागरिकाला डिजिटल अरेस्टची भीती दाखवत तब्बल २७ लाख २० हजारांची फसवणूक करण्यात आली. पर्वती परिसरातील जोशी ( ७२) यांना १३ ऑगस्ट रोजी अनोळखी मोबाइलवरूनएकाने आपण डाटा प्रोटेक्शन बोर्ड ऑफ इंडियाचा वरिष्ठ कार्यकारी अधिकारी अमन कुमार शर्मा असल्याचे सांगितले.

आधार कार्डशी संलग्न जोशींच्या मोबाइलवरून अल्पवयीन मुलींना अश्लिल कॉल व पोर्न व्हिडीओ पाठविल्याचे सांगत त्यांच्या नावावर नाशिक सायबर सेलमध्ये २२ तक्रारी असल्याचा दावा केला. त्यानंतर नाशिक पोलीस विभाग नावाने व्हॉट्स ॲपवर व्हिडीओ कॉल केला. त्यात एकजण पोलीस वेशात होता तर दुसऱ्याने नाशिक सायबर सेलचा पोलीस निरीक्षक संजय पिसे असल्याचे सांगितले.

जोशीचे कॅनरा बँकेत खाते असून त्यातील रक्कम दहशतवादी संघटनांना पाठविल्याचे सांगितले. आरोपींनी आरबीआयची कागदपत्रे, अटक वॉरंट आणि दहशतवादी संघटनांचे फोटो पाठवून दहशत निर्माण केली. याची माहिती कोणाला सांगितल्यास जोशी दाम्पत्याला दंड व कारावासाची धमकी दिली. सोने जप्त होऊ नये म्हणून ते मुथूट फायनान्समध्ये गहाण ठेवण्यास सांगितले.

जोशी यांनी १८ ऑगस्ट रोजी बँक ऑफ इंडिया, पद्मावती एंटरप्रायझेस या खात्यात २७ लाख २० हजार रुपये आरटीजीएस केले. आरोपींनी ईडीकडे रक्कम जमा केल्याची कथित पावतीही पाठविली. २४ ऑगस्टपासून आरोपींनी संपर्क तोडल्याने फसवणूक झाल्याचे स्पष्ट झाले. पर्वती पोलीस ठाण्यात गुन्हा दाखल झाला आहे. मोबाइल क्रमांकधारक, वापरकर्ते तसेच संबंधित बँक खात्याचे धारक व वापरकर्त्यांचा पोलीस शोध घेत आहेत. तपास पोलीस निरीक्षक (गुन्हे) अनिता हिवरकर करीत आहेत