Raksha Bandhan Baramati – रक्षाबंधनाच्या दिवशी लाडक्या बहिणींचे लाडके भाऊ, दिवंगत उपमुख्यमंत्री अजितदादा पवार यांच्या स्मृतींनी उपमुख्यमंत्री सुनेत्रा पवार यांच्यासह अनेक बारामतीकर भगिनींना भावुक केले. रक्षाबंधनाच्या निमित्ताने लाडक्या भावाची आठवण मनाला खंत बोचून गेली. बारामतीच्या विकासाचे शिल्पकार आणि लाडक्या बहिणींचे लाडके भाऊ दिवंगत अजितदादा पवार यांच्या निधनानंतरची ही पहिली राखी पौर्णिमा अनेक बहिणींसाठी भावूक ठरली.

‘लाडकी बहीण’ योजनेच्या माध्यमातून राज्यातील असंख्य महिलांच्या आयुष्यात आधाराचा हात देणाऱ्या अजितदादांची आठवण रक्षाबंधनाच्या दिवशी अनेक बहिणींना प्रकर्षाने जाणवली. उपमुख्यमंत्री सुनेत्रा पवार यांनी अजितदादांच्या स्मृतीस्थळी जाऊन त्यांच्या स्मृतींना अभिवादन केले. यावेळी त्यांनी आपल्या भावना व्यक्त करताना सांगितले की,

दादांची उणीव कायम जाणवत राहील; मात्र त्यांची प्रेरणा, आशीर्वाद आणि विकासाची दूरदृष्टी सदैव सोबत राहील., असेही त्यांनी नमूद केले.
कामाच्या व्यस्ततेमुळे रक्षाबंधनाच्या दिवशी अजितदादांना असंख्य बहिणींकडून प्रत्यक्ष राखी बांधून घेता येत नसे. मात्र, यंदा दादा नसल्याची उणीव प्रत्येकाच्या मनाला चटका लावली. या भावनांना वाट मोकळी करून देताना नटराज नाट्यकला मंडळाने उभारलेल्या अजितदादांच्या पुतळ्याला बारामतीतील महिलांनी राख्या बांधल्या.

“दादा आज आपल्यात प्रत्यक्ष नसले तरी त्यांच्या रूपाने हा पुतळा आमच्यासाठी आमचा भाऊच आहे. यापुढे प्रत्येक राखी पौर्णिमेला आम्ही दादांना याच ठिकाणी राखी बांधणार,” असा निर्धार महिलांनी केला. पुतळ्याला राखी बांधताना अनेक महिलांच्या डोळ्यांत अश्रू तरळले. “या पुतळ्याच्या माध्यमातून आमचा भाऊ कायम आमच्यापाशी राहील,” अशा शब्दांत महिलांनी आपल्या भावना व्यक्त केल्या.

अजितदादांच्या पुतळ्यास बांधल्या राख्या
दरम्यान, रक्षाबंधन आणि अजितदादांच्या निधनास सात महिने पूर्ण झाल्याच्या पार्श्वभूमीवर भावूक भगिनींनी आज पुन्हा दादांच्या आठवणींना उजाळा दिला. बारामतीतील तिरंगा सर्कल येथे नटराज नाट्य कला मंडळाच्या वतीने अजितदादांच्या पुतळ्यास अनेक भगिनींनी राख्या बांधून रक्षाबंधन साजरे केले. ॲड. प्रिया अमरेंद्र महाडिक,

नटराज नाट्य कला मंडळाचे अध्यक्ष किरण गुजर यांच्या संकल्पनेतून हा भावनिक उपक्रम पार पडला. लाडक्या भावाच्या पुतळ्याला राखी बांधताना अनेक भगिनींच्या भावना अनावर झाल्या. अजितदादांच्या आठवणींना उजाळा देत बारामतीकरांनी लाडक्या नेत्याप्रती प्रेम आणि जिव्हाळा पुन्हा एकदा व्यक्त केला.