MCOCA Action – नाना पेठेतील बंडू आंदेकर टाेळीचा प्रतिस्पर्धी सूरज ठोंबरे आणि साथीदारांविरुद्ध महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्याचे आदेश पोलीस आयुक्त अमितेशकुमार यांनी दिले. आंदेकर टोळीचा म्होरक्या कृष्णा आंदेकर आणि त्याच्या साथीदारांवर न्यायालयाच्या आवारात ठोंबरे आणि साथीदार हल्ला करण्याच्या तयारीत असल्याचे उघडकीस आले.

त्यानंतर या प्रकरणी ठोंबरे याच्यासह साथीदारांविरुद्ध भारती विद्यापीठ पाेलिसांनी गुन्हा दाखल केला होता. सूरज अशोक ठोंबरे (२४, रा. नाना पेठ), वेदांत रोहित सावंत (२१ रा. धनकवडी), अथर्व दत्तात्रय खोपडे (२१ रा. गुजरवाडी, कात्रज, मूळ रा. नाझरे, भोर), धीरज लखारा (रा. धनकवडी) मानव शरद ढमाले (२४, रा. धनकवडी) अशी मकोका कारवाई केलेल्यांची नावे आहेत.

याप्रकरणी आरोपी वेदांत, अथर्व आणि धीरज यांना अटक केली आहे. सूरज ठोंबरे आणि मानव ढमाले हे फरार असून, त्यांचा शोध घेण्यात येत आहे. नाना पेठेतील वर्चस्वाच्या वादातून बंडू आंदेकर याचा मुलगा नगरसेवक वनराज आंदेकर याचा दोन वर्षांपूर्वी सोमनाथ गायकवाड टोळीने खून केला होता. सूरज ठोंबरे हा गायकवाड याच्या जवळचा साथीदार आहे. त्याच्याविरुद्ध मकोका कारवाई करण्याचा प्रस्ताव भारती विद्यापीठ पोलिसांनी तयार केला. संबंधित प्रस्ताव अतिरिक्त पोलिस आयुक्त राजेश बनसोडे, पोलीस उपायुक्त मिलिंद मोहिते यांच्याकडे पाठविला होता

गुंड शोएब कुरेशीलासुद्धा ‘मकोका’
विश्रांतवाडी, येरवडा भागात दहशत माजविणारा गुंड शोएब कुरेशी याच्याविरुद्ध मकोका कारवाईचे आदेश पोलीस आयुक्त अमितेशकुमार यांनी दिले. या प्रकरणी शोएब रशीद कुरेशी (२६), हुसेन अस्लम खान (वय २१, दोघे रा. चंद्रमानगर, येरवडा), राज मुकेश सरवदे (२१, रा. भीमनगगर, विश्रांतवाडी) यांना अटक केली आहे. कुरेशीबरोबर गुन्हे करणाऱ्या अल्पवयीनाला पोलिसांनी ताब्यात घेतले आहे.