Pulse Polio Campaign – राष्ट्रीय पल्स पोलिओ लसीकरण मोहीम पाचगणी प्राथमिक आरोग्य केंद्राच्यावतीने राबवण्यात आली. स्थानिक लोकप्रतिनिधी, आरोग्य अधिकारी, आशा स्वयंसेविका आणि अंगणवाडी सेविकांच्या सक्रिय सहभागामुळे या मोहिमेला दुर्गम भागापासून ते शहरापर्यंत उदंड प्रतिसाद मिळाला. पर्यटकांच्या बालकांसाठी विशेष मोबाइल बूथ सुरू होते. एकूण 42 केंद्रांमध्ये पल्स पोलिओ लसीकरण करण्यात आले.

या मोहिमेचा प्रारंभ नगराध्यक्ष दिलीप बगाडे, महाबळेश्वर पंचायत समितीच्या सभापती शकुंतला चोरमले, सदस्या वंदना भिलारे आणि अतिरिक्त जिल्हा आरोग्य अधिकारी डॉ. सुनील चव्हाण यांच्या प्रमुख उपस्थितीत करण्यात आला. तालुका आरोग्य अधिकारी डॉ. प्रद्युम्न बुलाख यांच्या मार्गदर्शनाखाली संपूर्ण तालुक्यात ही मोहीम राबवण्यात आली.

पाचगणी आरोग्य केंद्रांतर्गत एरंडेल, भेकवली, टेकवली यांसारख्या डोंगराळ भागातील गावांसह 38 गावे आणि वाड्यावस्त्यांवर लसीकरण केंद्रे उभारण्यात आली होती. या केंद्रांवर पालकांनी सकाळपासूनच आपल्या मुलांना घेऊन गर्दी केली होती. आरोग्य कर्मचारी, आशा सेविका आणि अंगणवाडी सेविकांनी आधीपासून गृहभेटी करून, व्यापक जनजागृती केल्याने एकही बालक लसीकरणापासून वंचित राहिले नाही. पाचगणीत मोठ्या संख्येने पर्यटक येत असतात.

या पर्यटकांच्या कुटुंबांमधील बालके पोलिओच्या डोसपासून वंचित राहू नये, यासाठी आरोग्य विभागाने विशेष खबरदारी घेतली होती. पर्यटकांची वर्दळ असलेल्या टेबल लँड, एसटी स्टँड, पारसी पॉइंट, दांडेघर नाका या प्रमुख ठिकाणी विशेष मोबाइल बूथ कार्यान्वित करण्यात आली होती. या बूथवर शेकडो बालकांना पोलिओचे डोस देण्यात आले. पाचगणी आरोग्य केंद्रात डॉ. मैथिली बेलोशे, डॉ. विशाल टकले, आरोग्य सहायक एस. बी. रांजणे, तमन्ना काझी, डी. एच. यादव, जी. व्ही. रांजणे व आरोग्य विभागाचे कर्मचारी उपस्थित होते.