Ujjwal Nikam : 26/11 मुंबई दहशतवादी हल्ला म्हटलं की अजमल कसाबचं नाव आजही अंगावर काटा आणतं. मुंबईवर झालेल्या या भीषण दहशतवादी हल्ल्यात शेकडो निष्पाप नागरिकांचा जीव गेला आणि देश हादरला. या प्रकरणात कसाबविरोधात खटला लढवणारे ज्येष्ठ सरकारी वकील उज्ज्वल निकम यांची भूमिकाही अत्यंत महत्त्वाची ठरली.

आता याच पार्श्वभूमीवर अभिनेता राजकुमार राव यांच्या मुख्य भूमिकेतील ‘प्रहार: द अनटोल्ड स्टोरी ऑफ उज्ज्वल निकम’ हा सिनेमा चर्चेत आला आहे. या चित्रपटात ललित प्रभाकर कसाबची भूमिका साकारत आहे.

सिनेमा 16 ऑक्टोबर 2026 रोजी प्रेक्षकांच्या भेटीला येणार आहे. त्याआधी उज्ज्वल निकम यांनी कसाबसोबत घडलेला एक असा प्रसंग सांगितला आहे, ज्यामध्ये राखी, बहिणीची आठवण, कोर्टातील संवाद आणि त्यानंतर माध्यमांमध्ये रंगलेली ‘बिर्याणी’ची बातमी यांचा संबंध आहे.

एका प्रसिद्ध वहिनीला दिलेल्या मुलाखतीत उज्ज्वल निकम यांनी 26/11 प्रकरणाच्या सुनावणीदरम्यानचा हा किस्सा सांगितला. शनिवार-रविवारच्या सुट्टीनंतर सोमवारी ते पुन्हा न्यायालयात आले असता त्यांच्या हातात राखी बांधलेली होती. कसाबची नजर त्यांच्या हातातील राखीवर गेली. त्याने राखीकडे पाहून, ‘बादशाह ये क्या है?’ असा प्रश्न विचारल्याचं निकम यांनी सांगितलं.

त्यावर निकम यांनी कसाबला त्याच्या बहिणीची आठवण करून देत, ‘तेरा ये सौभाग्य कहाँ है, तेरी बहन तो पाकिस्तान में है. अब तू रोयेगा..’, अशा शब्दांत उत्तर दिलं. याचवेळी न्यायाधीश तिथे आले आणि दोघांमध्ये काय संवाद सुरू आहे, अशी विचारणा केली. त्यानंतर निकम यांनी न्यायाधीशांना त्यांच्यात झालेला संवाद सांगितला.

निकम यांच्या म्हणण्यानुसार, त्यावेळी कसाबने खाली मान घातली. हा प्रसंग पाहून माध्यमांमध्ये कसाबला आपल्या बहिणीची आठवण झाली आणि तो भावुक झाला, अशा स्वरूपाची चर्चा सुरू झाली.

‘कसाबला बिर्याणी हवी असेल तर तो मला मागेल…’

निकम यांच्या म्हणण्यानुसार, कसाबच्या वकिलांनी न्यायाधीशांसमोर हा मुद्दा उपस्थित केला. सरकारी वकील असलेल्या निकम यांच्याकडे कसाबने बिर्याणी मागितल्याची चर्चा कशी काय आली, असा प्रश्न उपस्थित करण्यात आला. यानंतर न्यायाधीशांनी निकम यांना याबाबत विचारलं. त्यावर निकम यांनी ‘तुम्ही कसाबला विचारा’, असं सांगितलं.

 

न्यायाधीशांनी कसाबला हिंदीत विचारलं की, ‘तुमने मटण बिर्याणी मांगी थी?’ त्यावर कसाबने पुन्हा मान खाली घातल्याचं निकम यांनी मुलाखतीत सांगितलं. या प्रसंगामुळे उपस्थितांना कसाबने खरंच बिर्याणीची मागणी केली होती, असा अर्थ निघाला.

मात्र या संपूर्ण प्रकरणाबाबत निकम यांनी एक महत्त्वाची गोष्ट स्पष्ट केली. कसाबने खरंच मटण बिर्याणी मागितली होती की नाही, हे फक्त आपल्याला आणि कसाबला माहिती आहे, असं त्यांनी सांगितलं. कसाब आता हयात नसल्याने त्या प्रसंगामागचं खरं सत्य कधीच समोर येणार नाही, असंही त्यांच्या वक्तव्याचा अर्थ आहे.

‘प्रहार’मध्ये ललित प्रभाकर साकारणार कसाबची भूमिका

दरम्यान, याच ऐतिहासिक आणि संवेदनशील प्रकरणाच्या पार्श्वभूमीवर ‘प्रहार: द अनटोल्ड स्टोरी ऑफ उज्ज्वल निकम’ हा सिनेमा प्रेक्षकांच्या भेटीला येत आहे. या चित्रपटात राजकुमार राव उज्ज्वल निकम यांच्या भूमिकेत दिसणार आहेत, तर ललित प्रभाकर कसाबची भूमिका साकारत आहे.