Rahul Gandhi – पंतप्रधान नरेंद्र मोदी, केंद्रीय गृहमंत्री अमित शहा आणि सरसंघचालक मोहन भागवत यांनी मतचोरीच्या माध्यमातून देशावर ताबा मिळवला. त्यांना मुख्य निवडणूक आयुक्त ज्ञानेश कुमार यांनी मदत केली, असा घणाघाती आरोप कॉंग्रेसचे नेते राहुल गांधी यांनी केला. मोदी, शहा, भागवत आणि कुमार यांनी देशातील लोकशाही संपवली. देशासमवेत जे काही केले गेले; त्याला देशद्रोह म्हणतात. त्यासाठी कुणाचीच गय केली जाणार नाही, असा इशाराही त्यांनी दिला.

दिल्लीतील आकाशवाणी भवनाच्या आवारात राहुल यांनी ठिय्या दिला. त्यावेळी पत्रकारांशी बोलताना त्यांनी भाजपवरही निशाणा साधला. राहुल खोटे बोलत असल्याची भूमिका भाजपकडून मांडली जात आहे. त्याविषयी पत्रकारांनी विचारलेल्या प्रश्‍नावर त्यांनी आक्रमक शैलीत उत्तर दिले. भाजप काय म्हणतो याच्याशी मला काही देणे-घेणे नाही.

मी देशाची लोकशाही वाचवण्यासाठी उभा आहे. माझ्या समवेत लोकसभा आणि राज्यसभेचे ३०० खासदार येथे आले आहेत. तेही लोकशाही वाचवण्याचा प्रयत्न करत आहेत. मोदी आणि इतरांनी लोकशाही संपवल्याचे संपूर्ण देशाला वाटते. युवकांनाही तसेच वाटत आहे. मला रोखणारे पोलिसही तसेच म्हणत आहेत. प्रत्येकाला वास्तव ठाऊक आहे, असे राहुल यांनी म्हटले.

पत्रकारांशी संवाद साधण्याआधी राहुल यांनी सोशल मीडियावरून निवडणूक आयुक्तांना लक्ष्य केले. निवडणूक आयुक्तांच्या भेटीसाठी विरोधी पक्षांच्या खासदारांनी संसद भवनातून कूच केले. आम्ही कोट्यवधी भारतीयांचे प्रतिनिधित्व करतो. निवडणूक आयुक्त आम्हाला भेटण्याचे का टाळत आहेत? पोलीस आम्हाला का रोखत आणि धमकावत आहेत, अशा प्रश्‍नांची सरबत्ती त्यांनी केली.