Dewald Brevis No Look Six in The Hundred 2026 Video Viral : क्रिकेटच्या मैदानात षटकार ठोकणे सामान्य मानले जाते, परंतु जेव्हा एखादा फलंदाज चेंडू कुठं जातोय हे न पाहताच थेट बाउंड्रीपार भिरकावून देतो, तेव्हा तो क्षण क्रिकेटप्रेमींसाठी खास ठरतो. ‘द हंड्रेड २०२६’ (The Hundred 2026) स्पर्धेत दक्षिण आफ्रिकेचा युवा फलंदाज डेव्हाल्ड ब्रेव्हिसने (Dewald Brevis) असाच एक थक्क करणारा ९७ मीटरचा ‘नो-लुक सिक्स’ (No-look Six) ठोकला आहे. ब्रेव्हिसची नाबाद ५५ धावांची खेळी आणि लियाम लिव्हिंगस्टोनच्या तुफानी ६६ धावांच्या जोरावर लंडन स्पिरिटने बर्मिंगहॅम फिनिक्सचा ७ गडी राखून पराभव केला.

९७ मीटरचा ‘नो-लुक’ सिक्स अन् लिव्हिंगस्टोनचा १०४ मीटरचा षटकार!

१६३ धावांच्या आव्हानाचा पाठलाग करताना लंडन स्पिरिटने अवघ्या ८२ चेंडूंत ३ बाद १६६ धावा करत १८ चेंडू बाकी असतानाच विजय मिळवला. ब्रेव्हिसने ३१ चेंडूंत नाबाद ५५ धावा केल्या. त्याच्या खेळीतील सर्वात खास क्षण तो होता, जेव्हा त्याने चेंडूवर पूर्ण ताकदीने प्रहार केला आणि मान खाली ठेवून ‘नो-लुक’ शैलीत ९७ मीटर लांब षटकार ठोकला.

Dewald Brevis launches a HUGE no-look six!

Watch all #TheHundred action live on BBC Two and Sky Sports 🍿#RoadToTheEliminator pic.twitter.com/r0yF8oD4aI

— The Hundred (@thehundred) August 9, 2026

दुसऱ्या बाजूने लियाम लिव्हिंगस्टोनने अवघ्या ३० चेंडूंत ६६ धावांची धडाकेबाज खेळी केली. यामध्ये त्याने १०४ मीटरचा गगनचुंबी षटकार मारला. जॉनी बेअरस्टो १० धावांवर बाद झाल्यानंतर ब्रेव्हिस आणि लिव्हिंगस्टोन यांनी १०३ धावांची विजयी भागीदारी रचली.

हेही वाचा – Zaheer Backs Shami : “ICC स्पर्धांसाठी शमीच्या अनुभवाचा फायदा घेतला पाहिजे…”, झहीर खानचे निवडकर्त्यांना आवाहन

जो क्लार्कचे अर्धशतक व्यर्थ –

तत्पूर्वी, प्रथम फलंदाजी करताना बर्मिंघम फिनिक्सने १०० चेंडूंत ४ बाद १६२ धावा केल्या होत्या. सुरुवातीच्या २५ चेंडूंत अवघ्या २५ धावा करणाऱ्या बर्मिंघमकडून जो क्लार्कने ४२ चेंडूंत ७३ धावा, तर सीन डिक्सनने २८ चेंडूंत नाबाद ५१ धावा करत संघाला सन्मानजनक धावसंख्या गाठून दिली. मात्र, लंडन स्पिरिटच्या आक्रमक फलंदाजीपुढे हे आव्हान तोकडे पडले. या विजयामुळे लंडन स्पिरिटने सातव्या स्थानावर आपली मोहीम संपवली, तर बर्मिंगहॅम फिनिक्स आठव्या स्थानावर कायम राहिले.