Maharashtra CM – मुख्यमंत्री एकनाथ शिंदेंनी अखेर आपल्या पदाचा राजीनामा दिला. आता ते काळजीवाहू मुख्यमंत्री म्हणून राजकारभार पाहतील. दुसरीकडे, भाजपच्या दिल्लीतील नेतृत्वाने महाराष्ट्राचे नवे मुख्यमंत्री म्हणून देवेंद्र फडणवीसांच्या नावावर शिक्कामोर्तब केल्याची माहिती आहे.

पण तत्पूर्वी, बरीच चर्चा व वाटाघाटी केल्याची माहिती आहे. त्यामुळे विधानसभा निवडणुकीत भाजप मोठा भाऊ ठरला असला तरी त्याच्या छोट्या भावांनी म्हणजे शिवसेना व राष्ट्रवादी काँग्रेसने सत्तावाटपाच्या चर्चेत चांगलाच जोर लावल्याची चर्चा आहे.

विधानसभा निवडणुकीत भाजप प्रणित महायुतीला निर्विवाद बहुमत मिळाले. महायुतीने ही निवडणूक मुख्यमंत्री एकनाथ शिंदे यांच्या चेहऱ्यावर लढवली. त्यामुळे शिंदे यांनाच मुख्यमंत्रीपदी कायम ठेवले जाईल असा दावा केला जात होता.

पण प्रत्यक्ष निवडणुकीत भाजपला सर्वाधिक जागा मिळाल्या. त्यामुळे भाजपच्या नेत्यांनी मुख्यमंत्रिपदासाठी फडणवीस यांच्या नावाचा आग्रह धरला. त्यानुसार, महाराष्ट्राचे मुख्यमंत्रिपद देवेंद्र फडणवीस यांच्याकडे सोपवण्याचा निर्णय दिल्लीत झाल्याची माहिती आहे.

तिसऱ्यांदा मुख्यमंत्री पदाचा मान?
उल्लेखनीय बाब म्हणजे देवेंद्र फडणवीस यांनी यापूर्वी 2014 ते 2019 पर्यंत मुख्यमंत्रिपद सांभाळले होते. त्यानंतर 2019 मध्ये राज्यात सत्तास्थापनेचा तिढा निर्माण झाल्यानंतर फडणवीस यांनी अजित पवारांच्या मदतीने पहाटेच्या वेळी दुसऱ्यांदा मुख्यमंत्रिपदाची शपथ घेतली होती. पण ते औटघटकेचे सरकार ठरले होते. त्यानंतर आता त्यांच्या नावावर शिक्कामोर्तब झाल्यास ते तिसऱ्यांदा मुख्यमंत्रीपदाची शपथ घेतील.

मुख्यमंत्र्यांसोबत 20 मंत्र्यांची शपथ
सूत्रांच्या माहितीनुसार, नव्या मुख्यमंत्र्यांसोबत भाजपचे 10 आमदार मंत्रिपदाची शपथ घेतील. तर शिवसेनेचे 6 व अजित पवार गटाचे 4 आमदार मंत्रिपदाची शपथ घेतील. महायुतीत मंत्रिपदासाठी चांगलीच स्पर्धा वाढली आहे.

एकट्या विदर्भातून तब्बल 24 आमदार स्पर्धेत आहेत. भाजपकडून सर्वाधिक 18, शिवसेनेतून दोन तर राष्ट्रवादी काँग्रेसकडून चौघांकडून दावेदारी केली जात आहे. यापैकी किती जणांना संधी मिळणार? याकडे सर्वांचे लक्ष लागले आहे.